Pavlodarlyq kompanııa jabdyq satyp alýǵa berilgen 90 mln teńge nesıeni maqsatsyz jumsaǵan

PAVLODAR. KAZINFORM – Kásiporyn usynǵan shot-faktýra  salyq organynyń aqparattyq júıesinde tirkelmegen. Al  satyp alynǵan jabdyq retinde tozyǵy jetken quraldardy kórsetken.

«Pavlodar» áleýmettik-kásipkerlik korporatsııasy» AQ men «Portal-PV» JShS arasynda qaryz týraly shart jasalyp, ol boıynsha korporatsııa sýbektige 90 mln teńge kóleminde zaem bergen. Qaryzdy tóleý merzimi - 2028 jylǵa deıin.

Alaıda júrgizilgen aýdıt barysynda seriktestiktiń «Portal-PV» kompanııasyna «Ivens Pavlodar» JShS-men 90 mln teńgege berilgen shot-faktýralar salyq organynyń aqparattyq júıesinde joq bolyp shyqqan. Buǵan qosa kásiporyn satyp aldym dep kórsetken jabdyqtary 1980 jyldary shyǵarylǵan, eski quraldar ekeni anyqtaldy.

«Pavlodar» ÁKK» «Portal-PV» JShS-nen 82,5 mln teńge qaryzdy, 1,15 mln teńge syıaqyny, sondaı-aq 22,5 mln teńge aıyppuldy merziminen buryn óndirip alý týraly sotqa talap aryz túsirgen. 

«Talap qoıýshy jaýapkerge tólem, merzimdilik, qamtamasyz etý, qaıtarý jáne maqsatty paıdalaný sharttarymen nesıe bergen. Birinshi satydaǵy sottyń sheshimimen talap qoıý qanaǵattandyryldy. Apellıatsııalyq shaǵymda jaýapker birinshi satydaǵy sot sheshiminiń kúshin joıyp, talapty qanaǵattandyrýdan bas tartý týraly jańa sheshim shyǵarýdy surady. Biraq jaýapker alynǵan zaemnyń maqsatty paıdalanylǵanyn rastaı almady. Tekserý barysynda satyp alynǵan qural-jabdyqtyń jańa emestigi, óndiriste burynnan qoldanylǵany anyqtaldy. Talapkerdiń dálelderi aýdıtorlyq eseppen, joba monıtorınginiń jáne zaemdy maqsatty paıdalanýdy tekserý aktilerimen rastalady», - dep habarlady Pavlodar oblystyq sotynyń baspasóz qyzmetinen. 

Sot alqasy sheshimdi ózgerissiz, al jaýapkerdiń apellıatsııalyq shaǵymyn qanaǵattandyrýsyz qaldyrdy. Qaýly zańdy kúshine endi. Jaýapker atalǵan somany 3 kúnniń ishinde qaıtarýy kerek.