Pavlodarlyq kolledj stýdenti Google kompanııasynan arnaıy shaqyrtý aldy
PAVLODAR. KAZINFORM — Pavlodar qalasyndaǵy IT-kolledjdiń stýdenti Danııl Bart Google kompanııasynan Berlın qalasynda ótetin halyqaralyq Google I/O — 2025 konferentsııasyna qatysý úshin arnaıy shaqyrtý aldy. Bul týraly Oqý-aǵartý mınıstrliginiń baspasóz qyzmeti habarlady.
Bul shara Eýropa, Azııa, Taıaý Shyǵys pen Afrıkanyń úzdik mamandaryn biriktiredi.
Danııl — álem boıynsha tehnıkalyq quzyrettilikti rastaýdyń qatań talaptarynan súrinbeı ótken sanaýly stýdentterdiń biri.
— Konferentsııa jáne odan keıingi taǵylymdama jasandy ıntellekt, Android, bultty platformalar men veb-tehnologııalar salasyndaǵy ozyq bilimge jol ashady. Men osyndaı deńgeıdegi sharaǵa elimniń atynan qatysatynyma qýanamyn, — deıdi Danııl Bart.
Stýdenttiń bul halyqaralyq kompanııamen seriktestigi 2023 jyly kolledjdiń 1-kýrsynda bastaldy. Ol Qazaqstanda Google uıymdastyrǵan tehnıkalyq is-sharalar men baıqaýlardy ótkizetin komanda quramyna kirdi.
Qazir Danııl Pavlodar aqparattyq tehnologııalar kolledjiniń 3-kýrsynda oqıdy. Baǵdarlamalaýǵa qyzyǵýshylyǵy mektepte paıda bolyp, kolledjde túrli baıqaýlar men hakatondarǵa belsendi qatysa bastady. 2023 jyly WorldSkills Kazakhstan baıqaýynda «altyn» jeńip aldy, 2024 jyly ol Iranda ótken halyqaralyq týrnırde úzdik ondyqqa endi. «Táýelsizdik ulany» syılyǵynyń laýreaty jáne Google qaýymdastyǵy aıasynda birqatar jobalardyń avtory bolyp tabylady.
Aıta ketelik jazǵy kanıkýlda oqýshylar men stýdentter jumys isteı alatyny týraly jazǵan edik.