Pavlodarlyq qyz bet-álpetin búldirgen kosmetologtan 400 myń teńge óndirip aldy
PAVLODAR. KAZINFORM - Oblys ortalyǵynyń turǵyny bet- álpetin ásemdeý maqsatymen kosmetologqa barǵan. Alaıda egilgen preparattan aýzy isip, betin búldirgen. Kásibı emes mamanǵa jolyqqanyn túsingen ol kosmetologty sotqa berip, 400 myń teńge ótemaqy óndirip aldy.
Pavlodarlyq qyz Instagram-daǵy jarnamany kórip, ernin úlkeıtpek oımen kosmetologtyń qabyldaýyna jazylǵan. Protsedýra barysynda egilgen preparattyń áserinen qyzdyń denesi qyshyp, dýyldaı jónelgen. Ol az bolǵandaı, erniniń aınalasy isip, túıinder paıda bolǵan. Aqyr-sońy qyz álginiń opa taptyrmaıtynyn sezdi me, qyzmetin aıaqtatpastan ózge kosmetologqa taıyp turǵan. Ol jerde barlyǵyn durys júrgizgen maman egilgen preparatty syrtqa shyǵaryp, ernin túzetip bergen.
«Sapasyz qyzmet kórsetken kosmetolog klıentke aqysynyń teń jartysyn, ıaǵnı 12,5 myń teńgesin ǵana qaıtaryp bergen. Buǵan kelispegen qyz bizdiń departamentke habarlasty. Oǵan sotqa shaǵym túsirýge keńes berdik. Nátıjesinde sot sheshimimen qyzmet kórsetýshi shaǵymdanýshyǵa 400 myń teńge ótemaqy tóleıtin boldy», - dep habarlady óńirlik saýda jáne tutynýshylardyń quqyǵyn qorǵaý departamentinen.
Buǵan qosa sot barysynda kosmetologtyń eshqandaı biliktiligi bolmaǵany anyqtalǵan. Oqıǵa kezinde ol arnaıy kýrsta bilim alyp júrgen.
Eske sala keteıik, Aýǵanstanda kóptegen sulýlyq salondary tyıym salynǵannan keıin jasyryn jumys istep jatyr.
