Pavlodarlyq kásiporyndar bıýdjetke 672,8 mlrd teńge paıda ákelgen
PAVLODAR. KAZINFORM - Statıstıkalyq derekterge súıensek, qazirgi ýaqytta oblysta 62 681 shaǵyn jáne orta bıznes sýbektisi tirkelgen.
Ertis-Baıan óńirindegi shaǵyn jáne orta kásipkerlikterdiń sany 2024 jyly 3,2 paıyzǵa óskeni baıqaldy. Olardyń negizgi bóligi kóterme jáne bólshek saýdada (24 262 birlik), aýyl sharýashylyǵy, orman jáne balyq sharýashylyǵynda (7 666), kólik jáne qoımalaý (4 957), qurylysta (3 962) shoǵyrlanǵan.
- Pavlodar oblysy boıynsha memlekettik kirister departamentiniń aqparatyna sáıkes, 2024 jyly kásipkerlik sýbektilerinen bıýdjetke túsken túsimder 672,8 mlrd teńgeni quraǵan. Kásipkerlik nysandarynyń kóbeıýine óńirimizde júzege asyp jatqan memlekettik qoldaý baǵdarlamalarynyń septigi mol. Bizdiń basqarma kásipkerlikti qoldaýdyń, onyń ishinde paıyzdyq mólsherlemeni sýbsıdııalaý (qaryz alýshy úshin túpkilikti mólsherleme 8-10%) jáne nesıeler boıynsha kepildik berý (kredıt somasynyń 50-85%) boıynsha qarjy quraldarynyń óńirlik úılestirýshisi qyzmetin atqarady,-deıdi óńirlik kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Darhan Ermaǵambetov.
Kásipkerlerdi qoldaý is-sharalary «Damý» kásipkerlikti damytý qory» AQ arqyly iske asyrylsa, qarjylandyrý ekinshi deńgeıdegi banktermen ómirsheń etilip otyr.
Buǵan qosa oblysta áleýmettik kásipkerlik sýbektileri úshin memlekettik granttar berý túrinde memlekettik qoldaý da keń taralǵan. Grant somasy 5 mln teńgege deıin, úmitkerler kezekte.kz saıty arqyly konkýrsqa qujattar jiberedi. Konkýrsqa qatysýshylardyń deni - «Bir aýyl-bir ónim» baǵdarlamasynyń fınalısteri jáne áleýmettik kásipkerlik sýbektileri.
- «Aýyl amanaty» jobasy sheńberinde de kásipkerler úshin shaǵyn nesıeler berilip keledi. Nesıeniń eń uzaq merzimi - 5 jylǵa deıin, mal sharýashylyǵy salasyndaǵy jobalar úshin – 7 jylǵa deıin uzartylǵan. Eń kóp somasy – 2 500 aılyq eseptik kórsetkishke deıin. Al aýyl sharýashylyǵy kooperatıvterin damytý úshin 8 000 aılyq eseptik kórsetkishke deıin resimdeýge bolady. Sonymen qatar, 400 AEK-ke deıingi granttar jáne jastarǵa 2,5%-ben nesıe berýge qatysty baǵdarlamalar da óz kezegimen júrip jatyr,-dep qosty basqarma ókili.
Eske sala keteıik, elimizde ınvestorlardy qoldaýdyń jańa tetikteri ázirlendi.