Pavlodarlyq kásipkerler zańsyz maınıngten 100 mln teńgege jýyq paıda tapqan
PAVLODAR. KAZINFORM - Pavlodarda krıptovalıýtamen aınalysyp, zańsyz dáýletke kenelgen kásipkerler anyqtaldy. Olar jalpy somasy 100 mln teńgege jýyq paıda tapqan.
Bul týraly óńirlik ekonomıkalyq tergeý departamentiniń ókilderi — basshynyń orynbasary Qambar Qabdýllın men departamenttiń birinshi jedel basqarmasynyń bastyǵy Jolaman Qınalbekov habarlady.
«Zańsyzdyqtyń biri Pavlodardyń ındýstrııalyq aımaǵyndaǵy bazalardyń birinde tirkeldi. Bul jerde zańsyz maınıng uıymdastyrylyp, krıptovalıýta óndirilgen. Arnaıy ruqsaty joq, tıisti salyq tólemegen kásipker 39 mıllıon teńgege jýyq tabys tapqan. Barlyq maınıng tehnıkasy tárkilendi. Al ekinshi jaǵdaıda kúdikti krıptoámııan arqyly taýardy satýdan túsken paıdany qolma-qol aqshaǵa aınaldyryp, zańsyz aıyrbastaý operatsııalaryn júrgizgen. Er adam Qazaqstanda da, Reseıde de zańsyz qyzmetpen aınalysqan. Onyń tabysy shamamen 60 mıllıon teńgege jýyqtaǵan», — dep málimdedi departament ókilderi
Eki derek boıynsha da QR Qylmystyq kodeksiniń 214-baby «Zańsyz kásipkerlik, zańsyz banktik, mıkroqarjylandyrý nemese kollektorlyq qyzmet» boıynsha qylmystyq is qozǵaldy.
Eske sala keteıik, Pavlodarda reseılik azamattan 4 mln teńgeniń maınıng jabdyqtary tárkilendi.