Pavlodarlyq kásipkerler zańda joq alym-salyqty tólep kelgen

PAVLODAR. KAZINFORM - Jalpy sany 167 kásipker bıýdjetke 21 mln teńgeniń alym-salyǵyn artyq tólegen. Jaýapty departament bul sanattaǵy alymdar 2022 jyly alynyp tastalǵanyn bıznes ıelerine durys túsindirmegen. 

Óńirlik antıkor qyzmeti jalpy sany 167 kásipkerdiń qazynaǵa 21 mln teńge salyqty artyq tólegenin anyqtady.

Atalǵan salyq túri 2022 jyldyń 1 qańtarynan bastap alynyp tastalǵan.

Alaıda bul ózgeris týraly oblystyń memlekettik kirister departamenti kásipkerlerge jetkilikti túsindirmegen.

«Ekologııa kodeksinde qorshaǵan ortaǵa kelgen zalal úshin arnaıy emıssııa tóleıtinderdiń 4 toby belgilengen. Alaıda qorshaǵan ortaǵa mınımaldy kólemde zııan keltiretin 4-shi top boıynsha salyq tóleý 2022 jyldan bastap joıylǵan. Saldarynan 167 kásipker jalpy somasy 21 mln teńgeni artyq tólegen. Bizdiń mamandarymyz arnaıy monıtorıng barysynda osy kemshilikterdi anyqtady. Departamentke olqylyqtardy túzetý, kásipkerlerdiń aqshasyn qaıtaryp berý jóninde keńes berildi» delingen óńirlik antıkor qyzmetiniń habarlamasynda.

Qazirgi ýaqytta 46 kásipkerlik nysanyna 4,5 mln teńgesi qaıtarylǵan.

Ózgesi boıynsha jumys jalǵasyp jatyr.