Pavlodarlyq kásipker óz qyzmetkerleriniń kartalary arqyly 100 mln teńgeden astam zańsyz aýdarym jasaǵan
PAVLODAR. KAZINFORM - Pavlodarda kıim satatyn býtıkterdiń ıesi qyzmetkerleriniń bank kartalaryn paıdalanyp, 107 mıllıon teńgege jýyq qarajat aýdarǵan degen kúdikke ilindi.
Tergeý nusqasyna sáıkes, ol muny bıznesin damytý jáne kassalyq apparattardyń ótkizý múmkindigi shekteýli ekenin alǵa tartyp júzege asyrǵan. Qylmystyq is sottyń qaraýyna jiberilgen.
Tergeý málimetinshe, kásipker 2024–2025 jyldar aralyǵynda qyzmetkerleriniń kartochkalyq shottary arqyly aqsha aýdarymdaryn júrgizgen. Oǵan qylmystyq jolmen alynǵan qarajatty túrli shottar arqyly ótkizýge múddeli adamdar júgingen degen boljam bar.
Pavlodar oblysy boıynsha ekonomıkalyq tergep-tekserý departamenti basshysynyń mindetin atqarýshy Ǵalıasqar Qasymovtyń aıtýynsha, qyzmetkerler bul aýdarymdar týraly habarsyz bolǵan.
- Olar júrgizilgen aýdarymdardan beıhabar bolǵan. Kásipker bıznesin damytý qajettigin, bir ǵana kassalyq apparat arqyly úlken somalardy ótkizýge úlgermeıtinin jáne qosylǵan qun salyǵyn tóleýshiler qataryna ótýi múmkin ekenin syltaý etken. Osy ýájdermen qyzmetkerleriniń bank kartalaryn alyp, ınternet-alaıaqtyqtan jáne basqa da qylmystyq áreketterden túsken qarajatty aýdaryp otyrǵan, – deıdi Ǵalıasqar Qasymov.
Qazirgi ýaqytta qylmystyq isti tergep-tekserý aıaqtalyp, materıaldar sottyń qaraýyna joldanǵan. Іstiń mán-jaıyna qatysty túpkilikti quqyqtyq baǵany sot beredi.
Eske sala keteıik, 5 mln teńgege deıingi nesıeni keshirýge ýáde bergen alaıaqtar ustaldy.
