Pavlodarlyq kartop tórt memleketke eksporttalyp jatyr

PAVLODAR. KAZINFORM — Bıyl Ertis-Baıan óńiriniń fermerleri 900 myń tonnaǵa jýyq kartop jınady. Búginde ónimniń 10%-y syrtqy elderge eksporttalǵan.

Pavlodar oblysynda bıyl 836,8 myń gektar alqapta astyq jınaldy. Jalpy ónim 1 mln 105,8 myń tonnany qurap, ortasha ónimdilik gektaryna 13,2 tsentnerdi kórsetti.

— Aýyl sharýashylyǵy daqyldary boıynsha eń joǵary ónimdilik kartoptan tústi — gektarynan 296 tonna, sondaı-aq gektarynan 13,7 tsentner bıdaı, 10,9 tsentner qaraqumyq jınaldy. Dıqandar qazirdiń ózinde 357 myń tonnadan astam bıdaıdy Tájikstan, Ózbekstan, Aýǵanstan, Qyrǵyzstan, Túrikmenstan, Ázerbaıjan memleketterine eksporttady, — dep habarlady óńirlik aýyl sharýashylyǵy basqarmasynyń basshysy Ádil Isın.

Kartop daqyly 30,2 myń gektardan jınalyp, jalpy kólemi 894,8 myń tonna ónim qambalarǵa quıylǵan. Pavlodar kartoby sapasymen erekshelenedi ári elimizben qatar, kórshiles memleketterde joǵary baǵalanady. Jergilikti fermerlerdiń ónimin qazirdiń ózinde syrt elderden satyp alyp jatqandar bar.

— 88 534,8 tonna kartop syrtqa eksporttaldy. Onyń ishinde negizgi eksporttaýshy el — Ózbekstan, olar 85,9 myń tonna kartop satyp aldy. Al Reseıge 1512 tonna, Túrikmenstanǵa 1020 tonna, Qyrǵyzstanǵa 22 tonna jóneltildi, — dep qosty basqarma basshysy.

Oblystaǵy egin sharýashylyǵyn qoldaýǵa jalpy somasy 6,1 mlrd teńge sýbsıdııa bólingen. Qarajat mıneraldyq tyńaıtqyshtar men pestıtsıdterdiń, aýyl sharýashylyǵy taýaryn óndirýshilerge sý jetkizý qyzmetiniń qunyn sýbsıdııalaýǵa, basymdy ósimdik sharýashylyǵyn damytýdy sýbsıdııalaýǵa, tuqym sharýashylyǵyn damytýdy qoldaýǵa baǵyttalǵan. Qazirgi ýaqytta egin sharýashylyǵyn sýbsıdııalaýǵa qosymsha bıýdjettik qajettilik 7,98 mlrd teńgeni qurap otyr.

Eske sala keteıik, elde egin jınaý naýqany aıaqtaldy.