Pavlodarlyq kardıologter naýqastyń ókpe arterııasyna elimizde joq ota jasady

PAVLODAR. KAZINFORM — Naýqas kólik apatynan paıda bolǵan jaraqattan uzaq ýaqyt azap shekken. Oǵan sırek hırýrgııalyq em — trombektomııa jasaldy.

63 jastaǵy azamat óńirlik kardıologııalyq ortalyqqa ókpe arterııalarynyń jalpy tromboembolııasy dıagnozymen shuǵyl túrde jatqyzyldy. Patsıenttiń aıtýynsha, ótken jyldyń jeltoqsan aıynda jol apatyna túsip, №1 Pavlodar qalalyq aýrýhanasynyń jaraqat bóliminde emdelgen. 

«Kardıologııa ortalyǵynda naýqastan ókpe trombembolııasynyń (TELA) belgileri anyqtaldy. Oń jaq ókpe segmentinde ınfarkt pnevmonııasy paıda bolǵan (ókpe arterııasynyń tarmaqtarynda qan uıyǵan). Júrektiń oń jaq qarynshasynda qan uıyp, júrektiń oń jaq bóligi ulǵaıǵan. Ókpe embolııasynyń jedel damýyna naýqastyń jambasynyń synýy, ókpeniń qatty soqqy alýy, uzaq ýaqyt boıy tómen qozǵalysta bolýy áser etken. Oǵan hırýrgııalyq em — trombektomııa jasaldy. Ókpe arterııalarynan iri qan uıyǵyshtary alyndy», - dep habarlady óńirlik densaýlyq saqtaý basqarmasynyń baspasóz qyzmetinen.

Búginde naýqas mamandandyrylǵan bólimshede em alyp jatyr. Ózin jaqsy sezinip, úıine shyǵýǵa daıyndalyp jatyr. 

Aıta ketý kerek, Qazaqstanda ashyq ádispen ókpe arterııasyna tromboekstraktsııa jasaý Pavlodardaǵy kardıologııalyq ortalyqta ǵana júrgiziledi.

2021 jyldan beri munda 40-qa jýyq tromboekstraktsııa jasalǵan.