Pavlodarlyq fermerler turǵyn úı sýbsıdııasyn ala almaı otyr
PAVLODAR. KAZINFORM — Óńirdiń aýyl sharýashylyǵy salasyndaǵy ınvestorlar turǵyn úı qurylysy boıynsha shyǵyndarǵa sýbsıdııa ala almaı otyr. Aıtýlarynsha, aımaqta aýyldardyń arnaıy tizimi bekitilmegen. Al aýyldarda qazirdiń ózinde 24 úıdiń qurylysy júrip jatyr.
Bıyl jyl basynda elimizdiń Ónerkásip jáne qurylys mınıstriniń buıryǵymen aýylda, kentte nemese aýyldyq okrýgte jaldamaly turǵyn úı salǵan jumys berýshilerdiń shyǵyndaryn sýbsıdııalaý qaǵıdalary bekitilgen. Erejede jumys berýshimen salynyp, paıdalanýǵa berilgen turǵyn úı shyǵyndaryn sýbsıdııalaý qarastyrylǵan. Aldyn ala málimetterge súıensek, oblys boıynsha aýylsharýashylyq taýaryn óndirýshilermen 24 úıdiń qurylysy júrgizilip jatyr.
Pavlodar oblysy prokýrorynyń aǵa kómekshisi Jandos Saǵatbekovtyń aıtýynsha, qurylystardy sýbsıdııalaý úshin jergilikti atqarýshy organdar aýmaǵynda ınvestorlar turǵyn úı salýdy josparlap otyrǵan aýyldardyń, kentterdiń, aýyldyq okrýgterdiń tizimin anyqtap, jergilikti ókildi organdarmen bekitýi qajet. Alaıda bizdiń óńirde bul tizim bekitilmegen. Osyǵan baılanysty jergilikti atqarýshy organdar atalǵan baǵytty sýbsıdııalaı almaıdy jáne qazirdiń ózinde birqatar kedergi bar.
Belgili bolǵandaı, «Kronos-Pavlodar» JShS bıylǵy naýryz aıynda ózderin atalǵan tizimge engizýdi ótingen. Biraq másele sol kúıi ornynan qozǵalmaǵan. Investor Aqsý qalasynyń Qanash Qamzın aýylynda qurylys júrgizilip jatqandyǵy týraly qaıtalap ótinish bergen. Ótinishti qabyldap alǵandar tizimge engiziletinin aıtypty. Alaıda aqyr-sońy tizimniń bekitilmegeni anyqtalyp otyr. «Kronos-Pavlodar» JShS-nyń zańgeri Tamıla Gashımovanyń aıtýynsha, qańtar aıynan bastap kompanııa Qanash Qamzın aýylyn qurylys júrgizetin aýyldar tizimine engizý týraly birneshe hat jazǵan.
«Bıylǵy 5 tamyzda Aqsý qalasynyń qurylys bólimi men Pavlodar oblysynyń qurylys basqarmasynan eldi mekenniń tizimge engiziletini týraly jaýap keldi. Ókinishke qaraı, sodan beri biz qosymsha eshqandaı aqparat ala almaı otyrmyz. Al turǵyn úılerdiń qurylysyn bastap ketkenbiz, qazir joba qyzý júrip jatyr», — deıdi ol.
Seriktestik taýarly sút fermasy ınvestıtsııalyq jobasy sheńberinde óz jumysshylary úshin jalǵa beriletin turǵyn úı turǵyzýda.
Mundaı máselege Sharbaqty aýdanyndaǵy «Pobeda» JShS da kezigip otyr.
«Biz óz qarajatymyzdy turǵyn úıler men ózge de nysandardyń qurylysyna salyp jatyrmyz. «Pobeda» JShS ózi ornalasqan Orlovka aýylyndaǵy barlyq áleýmettik salany únemi qoldaýmen keledi. Ótken jyly eki páterli bir úı paıdalanýǵa berildi. Bıyl taǵy bir baspananyń qurylysyn bastap kettik, ony 2025 jyly paıdalanýǵa beremiz. Biz aldaǵy ýaqytta tizimge enip, memleketten beriletin sýbsıdııaǵa iligemiz degen úmittemiz», — deıdi seriktestik dırektory Vladımır Polıakov.
Óńirlik qurylys basqarmasynyń basshysy Asqar Ajmurat qańtarda bekitilgen sýbsıdııalaý erejesin júzege asyrý oblysta kemshin qalǵanyn jasyrmady. Ókinishke qaraı, qurylysqa jaýapty jergilikti organdar tıisti dárejede jumystar júrgizbegen. Sýbsıdııa tóleý úshin memlekettik mekemelerge eń aldymen aýyl tizimin bekitý qajet. Qurylys basqarmasy bul jumysty birtindep bastap, oblystyń bes óńirinde, atap aıtqanda, Aqsý qalasynda, Ertis, Aqqýly, Sharbaqty, Jelezın aýdandaryndaǵy áleýetti aýyldar anyqtalǵan. Tizimdi bekitý úshin oblystyq máslıhatqa tıisti hat joldanady.
Eske sala keteıik, buǵan deıin pavlodarlyq kásipker «jumyskerin» sýbsıdııalanatyn tehnıkalar tizimine engizgisi keletini aıtyldy.