Pavlodarlyq fermerler sút, qııar jáne qyzanaqtyń baǵasyn ósirmeýge ýáde berdi
PAVLODAR. KAZINFORM - Pavlodar oblysynyń ákimdiginde óńirdiń aýyl sharýashylyǵy taýaryn óndirýshilermen memorandýmǵa qol qoıyldy.
Nátıjesinde 7 sút óńdeý kásiporny men 3 jylyjaı kesheni óz ónimderin áleýmettik dúkenderde, sondaı-aq, «Jaılaý» bazary men aýyl sharýashylyǵy jármeńkelerinde 15%-dan aspaıtyn ústemeaqymen satý boıynsha mindetteme aldy.
Bul týraly Pavlodar oblysynyń ákimdiginen habarlady.
- 2024-2025 jyldardaǵy qysqy kezeńde óz ónimderine belgilengen baǵany qamtamasyz etý týraly memorandýmǵa oblystyń 7 sút óńdeý kásiporny, sondaı-aq, 3 jylyjaı kesheni qol qoıdy. Kásiporyndar óz ónimderin áleýmettik dúkenderde, sondaı-aq, «Jaılaý» bazarynda jáne aýyl sharýashylyǵy jármeńkelerinde 15%-dan aspaıtyn ústemeaqymen satý boıynsha mindetteme aldy. Osylaısha, 1 lıtr (2,5%) súttiń baǵasy 385 teńgege deıin, qııar - 1100 teńgege deıin jáne qyzanaqtyń 1 kelisi úshin 850 teńgege deıin belgilendi.
Memorandýmǵa qol qoıǵan barlyq óndirýshiler memlekettik qoldaýǵa ıe bolyp otyrǵan kásiporyndar. Máselen, sútti qaıta óńdeýshilerge qaıta óńdeý kásiporyndaryn sýbsıdııalaý baǵdarlamasy boıynsha aýyl sharýashylyǵy shıkizatyn satyp alýǵa bıyl 1,4 mlrd teńge bólindi. Óńirdiń jylyjaı keshenderine 2023-2024 jyldar kezeńinde mıneraldy tyńaıtqyshtardy satyp alý boıynsha memlekettik qoldaý sharalary 116 mln teńgeni qurady.
Óńir basshysy Asaıyn Baıhanov oblys halqynyń suranysyn barynsha qamtamasyz etkenderi jáne baǵanyń negizsiz ósýine jol bermegenderi úshin kásipkerlerge alǵysyn bildirdi.
Buǵan deıin pavlodarlyq sharýalar kartoptyń baǵasyn 120 teńgeden asyrmaýǵa ýáde bergen.