Pavlodarlyq fermerler qoımadaǵy tonnalaǵan sábizdi sata almaı otyr

PAVLODAR. KAZINFORM — Jyl saıyn Ertis-Baıan óńirinde 200 myń tonnadaı sábiz jınalady. Bul kólem elimizdiń barlyq aımaǵyn qamtýǵa jetkilikti.

сәбіз
Фото: pixabay.com

Alaıda jergilikti kókónis ósirýshiler otandyq naryqty Reseıdiń arzan ónimi basyp bara jatqanyna narazy. 

Áleýmettik jelide pavlodarlyq fermerler óz ónimderin elimizdiń ońtústik óńirlerine jibere almaı otyrǵandaryn, sebebi Reseıdiń arzan sábizi aımaqtardy jaýlap alǵanyn jazyp jatyr. Pavlodarda jyl saıyn jumysshy kúshiniń, sýarmaly eginshilikke arnalǵan sýdyń, tyńaıtqyshtardyń quny ósip jatqanyna qaramastan sábizdiń baǵasy ózgermegen. Qazirgi ýaqytta olar sábizdiń kelisin tipti 100 teńgeden ótkize almaı otyrmyz dep muńdaryn shaqty. Vıdeoda kókónis saqtaý qoımasynda taý-taý bolyp úıilip jatqan sábizdiń buzyla bastaǵanynan kórýge bolady.

Agroónerkásip keshenindegi aýmaqtyq ınspektsııanyń resmı málimetine súıensek, Pavlodar oblysyna ózge memleketterden sábiz ákelinbegen.

— Óńirlik aýyl sharýashylyǵy basqarmasynyń mamandary «Rahmet» bazaryna monıtorıng júrgizip, ondaǵy sábizdiń jergilikti kókónis ósirýshilerden ǵana kelip túsetinin anyqtady. Fermerlerdiń qoımalarynda rasynda sábiz barshylyq. Aýyl sharýashylyǵy basqarmasy ónimdi syrtqa satýǵa kómek kórsetý týraly Aýyl sharýashylyǵy, Saýda jáne ıntegratsııa mınıstrlikterine, oblystardyń ákimdikteri men áleýmettik-kásipkerlik korporatsııalaryna hat jazdy. Onda sábizdiń kólemi men sharýa qojalyqtarynyń baılanys nómirleri kórsetilgen, — dep habarlady Pavlodar oblysy ákiminiń baspasóz qyzmetinen.

Deıturǵanmen, kórshi eldiń aqparat quraldarynda ótken qańtar aıynda Reseıdiń Volgograd oblysynan Qazaqstan aýmaǵyna 880 tonna sábiz satylǵany habarlanǵan. Al 2024 jyly Ózbekstan eli Qazaqstanǵa 50 myń tonnadan astam sábiz eksporttaǵan. Baǵa jaǵynan alǵanda Ózbekstan men Reseıdiń ónimi qazaqstandyq ónimnen arzanǵa shyǵady. Soǵan oraı otandyq ónim iri dúkender jelisinen tyqsyrylyp qala beredi. Pavlodarlyq fermerler ımport ónimge shekteý jasaýdy surap otyr.

Eske sala keteıik, buǵan deıin pavlodarlyq fermerler kartoptyń baǵasyn 120 teńgeden asyrmaýǵa ýáde bergen.

Сейчас читают