Pavlodarlyq fermerler kartoptyń baǵasyn 120 teńgeden asyrmaýǵa ýáde berdi

PAVLODAR. KAZINFORM - Ertis-Baıan óńirindegi kókónis ósirýshiler bıyl qys pen kóktemde kartoptyń kılogramyn 120, sábizdiń kılogramyn 100 teńgeden asyrmaýdy mindettendi. Aldaǵy kezeńge arzan baǵaly 10 myń tonna kartop, 3 myń tonna sábiz qoımalardy saqtalyp tur.

Aldaǵy qys pen kóktem mezgilinde belgilengen baǵany qamtamasyz etý, kartop pen sábizdiń qajetti kólemin saqtaý jónindegi memorandýmǵa oblystyń 22 aýyl sharýashylyǵy óndirýshisi qol qoıdy.

Kókónis ósirýshiler áleýmettik dúkenderde, fermerler bazarlarynda jáne óńirdiń apta saıynǵy aýylsharýashylyq jármeńkelerinde kartopty 110-120 teńgeden aspaıtyn baǵamen, al sábizdiń 1 kılogramyn 90-100 teńgeden aspaıtyn baǵamen satýǵa mindetteme aldy.

Óńir basshysy Asaıyn Baıhanov agrarshylarǵa oblys halqynyń kókónisterge degen qajettiligin barynsha qamtamasyz etip, kartop pen sábiz baǵasynyń ósýine jol bermegenderi úshin alǵysyn bildirdi.

- Eńbekterińiz ben áleýmettik jaýapkershilikterińiz úshin rahmet. Sizder aımaǵymyzdyń azyq-túlik beldeýin jasap otyrsyzdar. Jyl saıyn baǵanyń negizsiz ósýin boldyrmaý maqsatynda biz fermerlermen maýsymaralyq kezeńde satý úshin kókónisterdiń qajetti kólemin saqtaý jóninde memorandým jasaımyz, - dedi oblys ákimi.

Maýsymaralyq kezeńde oblys naryǵyn qoljetimdi kókónistermen qamtamasyz etý úshin 10 myń tonna tonna kartop pen 3 myń tonna sábiz saqtalatyn bolady. Qoımalardan aıyna arzan baǵaly 1290 tonna kartop pen 433 tonna sábiz shyǵarylady jep josparlanǵan.

Eske sala keteıik, bıyl Pavlodar oblysynda rekordtyq astyq jınaldy.

Pavlodar oblysy keıbir azyq-túliktiń arzandyǵy boıynsha elimizdegi bestikke kiredi