Pavlodarlyq fermerler gektarynan 250 tsentner kartop jınap jatyr

PAVLODAR. KAZINFORM - Ertis-Baıan óńirinde jıyn-terim jumystary qyza bastady. Fermerler 31,2 myń gektar alqaptan kartop jınaýy kerek.

Oblysta aýyl sharýashylyǵy daqyldaryn jınaý alańy 1 445,4 myń gektardy quraıdy. Bul ótken jylǵy deńgeıden 78,7 myń gektarǵa artyq. Onyń ishinde sýarmaly jerler aýmaǵy - 82,1 myń gektar.

- Bıyl kartop 31,2 myń gektar alqaptan jınalady, bul ótken jyldyń deńgeıimen salystyrǵanda 24,8%-ǵa kóp. Kókónister men baqsha daqyldary 9,4 myń gektar nemese byltyrǵydan 14,6%-ǵa artyq. Qazirgi ýaqytqa deıin jalpy eginniń 35,6 myń gektary nemese 2,5% - y jınaldy. Dándi daqyldardy jınaýdyń boljamdy merzimi 25 qyrkúıekke deıin, maıly daqyldar - 25 qazanǵa deıin. Jalpy ónimdilik turaqty dep baǵalanady. Bıyl jazdyń jańbyrly bolýyna baılanysty kóp jerlerde egin bitik shyqqan. Topyraqtaǵy ylǵal qory da áser etti, - deıdi óńirlik aýyl sharýashylyǵy basqarmasy basshysynyń orynbasary Álibek Qalenov.

Qazirgi ýaqytta oblys fermerleri dándi daqyldar boıynsha gektarynan ortasha eseppen 10-11 tsentner, kartoptan 250 tsentner, kókónister men baqsha daqyldary boıynsha 250-350 tsentner ónim jınap jatyr. 

Egin jınaý naýqanyna barlyq modıfıkatsııadaǵy 2286 birlik traktor, 2318 kombaın, 1033 oraq, astyq tasymaldaıtyn 2668 avtokólik pen 1275 traktor tirkemeleri jumyldyrylǵan. Jıyn-terimge barlyǵy 20 myńnan astam adam qatysýda. 

«Mol astyqty shashpaı-tókpeı jınap alý úshin dıqandarǵa 33,2 myń tonna arzandatylǵan janar-jaǵarmaı bólindi. Memlekettik qoldaý sharalary búkil vegetatsııalyq kezeńge sýbsıdııalaý retinde bólinip otyr. Bıylǵa jalpy somasy 6,1 mlrd teńge qarastyrylǵan. Oblystaǵy astyq qabyldaý oryndary tolyqtaı daıyn. Tek qazirgi jańbyrly kúnder uzaqqa sozylmasa eken deımiz. Qyrkúıekte ashyq kúnder kóp bolsa, astyq jınaý naýqanynda problema bolmaıdy dep oılaımyz», - dep qosty basqarma ókili.

Eske sala keteıik, bıyl Pavlodar oblysynda 2,67 mln tonna astyq jınalady dep boljanyp otyr. 

Al byltyr aımaqta 769 myń tonna kartop jınalǵan.