Pavlodarlyq eki turǵynnan 60 keli marıhýana tabyldy
PAVLODAR. KAZINFORM — Polıtsııa esirtkini asa iri mólsherde satý boıynsha kúdikke ilingen eki jergilikti turǵyndy ustady. Sot sanktsııasymen kúdiktiler qamaýǵa alynǵan.
Uıymdasqan qylmysqa qarsy kúres jónindegi jedel qyzmetkerler prokýratýranyń úılestirýimen asa iri mólsherde esirtki zattaryn ótkizý dereginiń jolyn kesti.
Jedel-izdestirý is-sharalaryn júrgizý barysynda Pavlodar qalasynda esirtki zattaryn satpaqshy bolǵan eki jergilikti turǵyn ustalǵan.
— Tintý is-sharalary barysynda olardan jalpy salmaǵy shamamen 60 keli bolatyn «keptirilgen marıhýana» esirtki zaty, aqshalaı qarajat, uıaly telefondar, bank kartalary jáne túrli qural-jabdyqtar tabylyp, tárkilendi, — dep habarlady Pavlodar oblysy polıtsııa departamenti uıymdasqan qylmysqa qarsy kúres basqarmasynyń bastyǵy Ǵabıt Qabdrahmanov.
Sot sanktsııasymen kúdiktiler qamaýǵa alyndy.
Polıtsııa qyzmetkerleri ustalǵandardyń osyǵan uqsas ózge de qylmystarǵa qatysy bar-joǵyn tekserip jatyr.
Eske sala keteıik, Almaty áýejaıynda 32 keliden astam esirtki tárkilendi.
