Pavlodarda dúkender qyzanaq pen qııardyń kelisin 1000 teńgeden asyrmaı satady

PAVLODAR. KAZINFORM -  Pavlodar oblysynyń ákimdigi men óńirdiń jylyjaı keshenderi arasynda yntymaqtastyq týraly memorandýmǵa qol qoıyldy.

Memorandýmǵa sáıkes, sharýashylyqtar keminde 140 tonna qııar men 100 tonna qyzanaqty bekitilgen kóterme baǵamen – 1 kelisin 850 jáne 800 teńgeden jetkizýge mindetteledi.

- Áleýmettik dúkenderdegi bólshek saýda baǵasy qııar úshin 980 teńge/kg, qyzanaq úshin 925 teńge/kg bolady. Aýyl sharýashylyǵy jármeńkelerinde qııardyń kelisi 890 teńgeden, qyzanaq 840 teńgeden satylady. Arzan qııar 5 jeltoqsannan Pavlodar, Ekibastuz jáne Aqsý qalalaryna jetkizile bastaıdy, - dep habarlady óńir ákimdiginen.

Aımaqta jylyna 14 myń tonnadan astam kókónis óndiretin úsh iri jylyjaı kesheni jumys isteıdi. Sońǵy 6 jylda óńirdiń jylyjaı sharýashylyqtaryn damytýǵa 312,2 mln teńge bólinip, memlekettik qoldaý kórsetilgen. 2025 jyly elektr energııasyna jumsalǵan shyǵyndardyń ótemaqysy 163,2 mln teńgeni quraǵan.

- Bizdiń mindetimiz - qys mezgilinde áleýmettik mańyzy bar kókónisterdiń jáne joǵary suranysqa ıe kókónister baǵasynyń qymbattaýyna jol bermeý jáne naryqty turaqty túrde sapaly ónimmen qamtamasyz etý, - dep atap ótti oblys basshysy Asaıyn Baıhanov.

Eske sala keteıik, áleýmettik mańyzy bar taýarlar tizbesi keńeıtilip, jańa jyl aldynda baǵany baqylaý kúsheıe túspekshi.