Pavlodarlyq dárigerler zeınetkerdiń ótinen 60-qa jýyq tas alyp shyqty

PAVLODAR. KAZINFORM - Dárigerler naýqasqa bir kezeńde eki birdeı ota jasap, ót qaby men ót jolyna jınalǵan tastardy sylyp alǵan. Munshama kóp shamadaǵy ót tasynyń bolýy medıtsınada sırek jaǵdaı delinip otyr.

77 jastaǵy Ámirǵaly Sádýaqasovtyń ishi qatty búrip, qan qusa bastaǵan. Jedel járdem zeınetkerdi №1 Pavlodar qalalyq aýrýhanasyna shuǵyl jetkizip, hırýrg Nursultan Andasbekov másele naýqastyń densaýlyq jaǵdaıymen baılanysty ekenin anyqtaǵan. Naqty dıagnozǵa kóz jetkizý úshin ınfýzıondy terapııa jáne qursaq qýysynyń magnıtti-rezonansty tomografııasy jasalǵan.

– MRT zertteýi kezinde ót joldarynda kóptegen tastardy anyqtap, bir anestezııamen bir ýaqytta eki túrli ota jasaýdy sheshtik. Birinshi kezeń – pýnktsııalar arqyly ishinde tastary bar ót qabyn alý. Biraq tastar ót qabynyń joldarynda turǵandyqtan olardy aýyz qýysy arqyly alyp tastaýǵa májbúr boldyq. Adam aǵzasynda dıametri 0,4-ten 0,7 santımetrge deıin 60-qa jýyq tas paıda bolýy sırek jaǵdaı. Ádette, hırýrgtar eki nemese úsh tasty alyp tastaıtyn otalardy jasaıdy, - deıdi hırýrg Nursultan Andasbekov.

Qazir zeınetkerdiń jaǵdaı jaqsy. Jeti kúnnen keıin qaıtadan aýrýhanaǵa oralyp, ish qýysy dıagnostıkasynan ótýi kerek. Eger ót qabynyń joldary taza bolsa, hırýrgtar ish qýysyndaǵy stentti alyp tastaıdy.

Eske sala keteıik, Jetisýda alǵash ret qaterli isikke kúrdeli ota jasaldy.