Pavlodarlyq dárigerler búırek dertine shaldyqqan balany aman alyp qaldy

PAVLODAR. KAZINFORM — Eki jasar balaǵa arnaıy apparattyń kómegimen emshara jasalǵan. Mundaı kúrdeli dıalız Pavlodarda alǵash ret júzege asyp otyr.

Oblystyq balalar aýrýhanasyna eki jasar bala aýyr jaǵdaıda túsken. Dárigerlerdiń aıtýynsha, bala ózdiginen kishi dáretke bara almaı qalǵan.

Buǵan búırektiń jumysyn toqtatýy sebep bolǵan. Aq halattylar kishi dáretti kateter arqyly almaq bolǵanymen, sábıdiń jaǵdaıy jaqsarmaǵan.

Denesine isik kire bastapty. Mamandar arnaıy apparattyń kómegine júgingen. Bul ádis eń sońǵy múmkindik bolǵanyn aıtady.

Qurylǵynyń kómegimen balanyń qanyn tazartý úshin tamyr arqyly boıǵa suıyqtyq jiberilgen. Tek osydan keıin ǵana sábıdiń beti beri qaraı bastapty.

«Apparattyń kómegimen emshara jasaǵannan keıin 18 saǵat ishinde balanyń qan taldaýlary qalypqa kele bastady. Ekinshi kúni bala ózdiginen tynys alyp, birtindep esin jıdy. Úshinshi kúni anasyn palataǵa kirgizdik. Balasy anasyn tanyp, talpynǵanda anasy qýanyshtan kóz jasyna erik berdi. Bunyń barlyǵy 2023 jyly satyp alynǵan Prismafex apparatynyń arqasynda júzege asty», -deıdi óńirlik balalar aýrýhanasy jansaqtaý bóliminiń meńgerýshisi Qýat Arǵynov.

Bala eki apta boıy jansaqtaý bóliminde em alǵan. Dárigerler onyń jaǵdaıy jaqsaryp qalǵanyn aıtady.

Jaqynda úıge shyǵarylady dep kútilýde.

Eske sala keteıik, elimizde birinshi ret búırekti aıqas transplanttaý otasy jasaldy