Pavlodarlyq dáriger ushaqta jaǵdaıy nasharlaǵan jolaýshyny qutqaryp qaldy
PAVLODAR. KAZINFORM — Pavlodarlyq dáriger Murat Súleımenov ushaq bortynda shuǵyl jaǵdaı kezinde kómek kórsetti. Ol ushý kezinde esinen tanǵan jolaýshy áıeldiń esin jıǵyzyp, ómirin saqtap qalǵan.
Óńirlik densaýlyq saqtaý basqarmasynan habarlaǵandaı, 29 jeltoqsan kúni Tashkentten Astanaǵa baǵyt alǵan áýe kemesinde bir jolaýshynyń jaǵdaıy kúrt nasharlap ketken. Bul ýaqytta ushaqtyń bortynda pavlodarlyq anestezıolog-reanımatolog Murat Súleımenov ta bolǵan. Ol esinen tanyp qalǵan áıelge dereý medıtsınalyq kómek kórsetti. Kýágerlerdiń aıtýynsha, ol naýqastyń janynda bir saǵattaı bolyp, barlyq jaǵdaıyn jasaǵan.
— Jolaýshynyń qan qysymy tómendep ketken eken, ol bizdiń suraqtarymyzǵa jaýap bere almady. Ony ushaq edeninen jatqyzyp, aıaqtaryn 45 gradýs bıiktikke kóterdik. Mundaı jaǵdaıda qolǵa túsken kez kelgen zatty aıaq astyna qoıýǵa bolady. Biz plastık jáshikterdi paıdalandyq. Gıpotonııa kezinde bul adamǵa kómektesedi, - deıdi Murat Súleımenov.
Ekıpajdyń úılesimdi jumysy men Murat Súleımenovtiń kásibıliginiń arqasynda áıeldiń jaǵdaıy aıtarlyqtaı jaqsaryp, saparyn ári qaraı jeńil ári senimdi túrde jalǵastyra alǵan.
Murat Súleımenov Pavlodar temirjol aýrýhanasynda anestezıolog bolyp jumys isteıdi. Joǵary biliktilik sanatyna ıe jáne 28 jyldyq eńbek ótili bar.
Eske sala keteıik, «Salamatty Qazaqstan» poıyzy dárigerleri 8 myńǵa jýyq ota jasady.