Pavlodarlyq áskerıler ardagerdi ǵasyrlyq mereıtoıymen quttyqtady
ASTANA. KAZINFORM — Pavlodar oblysynda áskerı qyzmetshiler soǵys ardageri Marııa Matıýshınany ǵasyrlyq mereıtoıymen quttyqtap, alǵys bildirdi, dep habarlaıdy Qorǵanys mınıstrliginiń baspasóz qyzmeti.
Uly Otan soǵysynyń qatysýshysy Marııa Alekseevna Matıýshınany Pavlodar oblysy boıynsha Qorǵanys isteri departamentiniń, Pavlodar aýdanynyń biriktirilgen bóliminiń áskerı qyzmetshileri jáne QR Qarýly Kúshteri ardagerleri RQB fılıalynyń tóraǵasy arnaıy baryp quttyqtady.
Qorǵanys mınıstriniń atynan olar mereıtoı ıesine quttyqtaý hatyn tabystap, onyń erligi, janqııarlyǵy jáne Jeńiske qosqan úlesi úshin shynaıy alǵys bildirdi.
— Biz aǵa býynnyń erligin eshqashan umytpaımyz. Qıyndyqtar men aýyr synaqtarǵa qaramastan, sizder eń qatygez soǵysta tótep berip, rýh myqtylyǵyn saqtap, Otan ıgiligi úshin eńbek etýdi jalǵastyrdyńyzdar. Sizderge myń taǵzym, — dedi QR Qarýly Kúshteri ardagerleri RQB fılıalynyń tóraǵasy Jan Qarataev.
Marııa Matıýshına 1926 jylǵy 19 qańtarda Týla oblysynda jumysshylar otbasynda dúnıege kelgen. 1942 jyly ol ata-anasynana aıtpaı áskerı jasyryný mamandary kýrsyna óz erkimen jazylady. 1943 jyldyń aqpanynda 80-shi áskerı-dalalyq qurylys basqarmasynyń quramynda maıdanǵa attanady. Er adamdarmen qatar ol qorǵanys nysandaryn — okoptar, dzottar, dottar men blındajdar salýǵa qatysady. 104-shi áskerı qurylys otrıadynyń 225-shi basqarmasy quramynda Vıtebsk qalasyna deıin jetip, keıin bólimshe Mýrmansk oblysynyń Petrozavodsk qalasyna aýystyrylady. Dál sol jerde, Fınlıandııamen shekarada, Jeńisti qarsy alady. Marııa Matıýshına 1945 jyly áskerden bosatylady. Turmysqa shyǵyp, 1955 jyly tyń ıgerý naýqanyna baılanysty Qazaqstanǵa qonys aýdarady. Joldasymen birge úsh ul men bir qyz tárbıelep ósirgen.
Marııa Alekseevnanyń erligi II dárejeli Otan soǵysy ordenimen, Jýkov medalimen jáne basqa da mereıtoılyq nagradalarmen atap ótilgen.
Budan buryn SQO-da ІІ Dúnıejúzilik soǵystyń sońǵy ardageri ómirden ótkenin jazǵanbyz.