Pavlodarǵa jańa tramvaılardy eýropalyq qarjylandyrý arqyly satyp alý múmkin bolmady
PAVLODAR. KAZINFORM — Eýropa Qaıta Qurý jáne Damý Banki tramvaı satyp alýdy qarjylandyrýdan bas tartqandyqtan, pavlodarlyq sheneýnikter qarajatty jergilikti bıýdjetten izdeýge májbúr bolǵan.
Bastapqyda Pavlodarǵa tramvaı satyp alý Eýropa Qaıta Qurý jáne Damý Bankimen jasalǵan kelisim aıasynda josparlanǵan edi. Alaıda 2025 jyldyń sońynda kelisim buzylǵan. Kelisimshart tikeleı «Belkommýnmash» AAQ-men jasalǵanyna baılanysty EQDB ony qarjylandyrýdan bas tartqan.
— Shetel kapıtalyn tartýdan tolyq bas tartyp, jobany bıýdjettik ınvestıtsııalar formatynda júzege asyrý týraly sheshim qabyldandy. Tramvaı satyp alýǵa qarajat tikeleı Pavlodar qalasynyń bıýdjetinen bólindi. Jetkizýshini anyqtaý úshin memlekettik satyp alý portaly arqyly ashyq konkýrs ótkizildi. Konkýrs qorytyndysy boıynsha jeńimpaz retinde «AgrobıznesQazaqstan» JShS tanyldy. Bul — Qazaqstandaǵy «Belkommýnmash» AAQ-nyń resmı dıstrıbıýtory, — dep habarlady Pavlodar qalasynyń ákimdiginen.
Jyl basynan 10 jańa vagon satyp alynyp, Pavlodarǵa jetkizilgen. Sheneýnikterdiń aqparaty boıynsha, jetkizýshi valıýta aıyrbastaýǵa, Belarýs Respýblıkasyndaǵy zaýyt-óndirýshimen esep aıyrysýǵa, sondaı-aq tramvaılardy Pavlodarǵa tasymaldap, jetkizýge baılanysty barlyq táýekelderdi óz moınyna aldy.
— Bir tramvaı vagonynyń qorytyndy quny — 440,8 mıllıon teńge, onyń ishinde QQS — 60,8 mıllıon teńge. QQS-syz quny 380 mıllıon teńge bolady. Jasalǵan shart talaptaryna sáıkes vagondardy tasymaldaýǵa, iske qosý-jóndeý jumystaryn júrgizýge jáne kepildik qyzmet kórsetýge baılanysty shyǵyndardy jetkizýshi kóteredi, — dep qosty Pavlodar qalasynyń ákimdiginen.
Sonymen qatar 2027 jyldyń sońyna deıin pavlodarlyq sheneýnikter taǵy 65 jańa vagon satyp alýdy josparlap otyr. Satyp alý qarjylyq lızıng arqyly josparlanýda. Qazirgi ýaqytta jetkizýshini anyqtaý úshin memlekettik satyp alý kezeńi ótýde.
Eske sala keteıik, Pavlodar tramvaı parki oblystyń kommýnaldyq menshigine ótti.
Pavlodar bıligi tramvaı parkin jańartýǵa 48,9 mlrd teńge baǵyttamaqshy.
