Pavlodarǵa Túrkistan oblysynan jetkizilgen 10 tonna oramjapyraq muqtaj otbasylarǵa beriledi
Pavlodarǵa Túrkistan oblysynan oramjapyraq tıelgen 10 tonnalyq júk kóligi keldi. Oblystyq jastar bastamalaryn damytý ortalyǵynyń janynda 10-nan astam eriktiler uıymy oramjapyraqty óz kólikterine tıep aldy. Eriktiler kókónisti tıisti uıymdarǵa, muqtaj otbasylarǵa jetkizedi. Kómek kórsetý aktsııasyn «Birgemiz» óńirlik keńsesi men Qazaqstan jastar Kongressi uıymdastyrdy. - Túrkistandyq dıqandar soltústik óńirlerge kómek qolyn sozýǵa bel baılady, - deıdi «Birgemiz» óńirlik keńsesiniń jetekshisi Saıagúl Serikbekqyzy. – Júk kóligin toltyryp bizge oramjapyraq jiberdi. Bul kómek qarttar úıi, analar úıi, balalar úıi jáne basqa da áleýmettik uıymdarǵa, sondaı-aq bizdegi eriktiler uıymdarynyń qaraýyndaǵy muqtaj otbasylarǵa taratylady. Kókónisti taratýǵa 40 otbasyny jaýaptanǵan «Vıta» Pavlodar qalasynyń izdeýshileri de keldi. - Sońǵy 1 aı ýaqyt aralyǵynda joǵalǵan adamdardy izdeýmen qatar, muqtaj otbasylarǵa azyq-túlik jıyntyǵyn taratýmen de aınalysyp júrmiz, - deıdi pavlodarlyq izdeýshilerdiń biri Lıýdmıla Bylınına. – Oramjapyraq týraly JBDO qońyraý shaldy. Biz kómekke muqtaj kóp balaly otbasylarǵa, jalǵyzbasty qarttar men múgedek qarttarǵa kómektesýdemiz. Osy ýaqytqa deıin 1 myń azyq-túlik jıyntyǵyn tarattyq. Bizde kómek kórsetýmen aınalysatyn 18-50 jas aralyǵyndaǵy 70-ke jýyq erikti bar. Pavlodar oblysyndaǵy AITV (adamnyń ımmýn tapshylyǵy vırýsy) juqtyrǵan jandarǵa kómek kórsetýmen aınalysatyn «Sen jalǵyz emessiń» qoǵamdyq qory da oramjapyraqtardy taratýǵa kiristi. - Oramjapyraq taratylatynyn estigende qýanyp qaldyq, -deıdi qor ókili Nadejda Sapýnova. – Óńirimizde AITV juqtyrǵan kóp balaly otbasylar, karantınge qatysty jumysynan aıyrylǵan jáne basqa da jaǵdaıǵa baılanysty muqtaj otbasylar kóp. Jalpy bizdiń qor qaraýynda 300-den astam adam bar. Shtabymyzda 9 adam jumys jasaıdy. Búgin Pavlodar qalasyndaǵy 100-ge jýyq adamǵa kókónisti jetkizip berýdi josparlap otyrmyz.
Aıta keteıik, pavlodarlyq eriktiler Túrkistan oblysynyń fermerleri jibergen syıdy osy demalys kúnderi tolyq taratyp bermek.