Pavlodarǵa Sultanmahmut Toraıǵyrovtyń shyǵarmalar jınaǵy jetkizildi
Pavlodarda Buqar Jyraý atyndaǵy ádebıet jáne óner mýzeıiniń bólim meńgerýshisi Erbol Qaıyrov qazaqtyń kórnekti aqyny Sultanmahmut Toraıǵyrovtyń 1933 jyly Qyzylordada jaryqqa shyqqan óleńder jınaǵyn jetkizdi. Jerlesimizdiń sırek kezdesetin kitaby jýyrda mýzeıge qoıylady, dep habarlaıdy pavlodarnews.kz.
«Sultanmahmut Toraıǵyrovtyń tolyq shyǵarmalar jınaǵy» dep atalatyn jınaqqa aqynnyń óleńderi, áńgimeleri jáne poemalary toptastyrylǵan. Aqyn ómirden ótken soń, onyń eńbegin Júsipbek Aımaýytov on jyldaı jınaqtap, alǵy sózin jazyp, baspaǵa tapsyrǵan. Biraq, J.Aımaýytov «halyq jaýy» degen jalǵan jalamen atý jazasyna kesilgen soń, ol kitaptyń alǵy sózin Sábıt Muqanov jazǵan. Abaıtanýshy, ǵalym Qaıym Muhamedjanov bir eńbeginde: «Júsipbek bolmasa Toraıǵyrovtyń tolyq jınaǵynyń shyǵýy, onyń tolyq ómir tarıhyn bilýimiz neǵaıbyl edi» - dep jazady.
«Bul qoljazba buǵan deıin Qazaqstannyń halyq aqyny Dıhan Ábilevtiń úıinde saqtalǵan eken. Almatyǵa barǵan saparymda Dıhan Ábilevtiń úıine arnaıy baryp, jerlesimizdiń osy eńbegin qolǵa túsirdim. Bul endi bizdiń mýzeıde saqtalady. Óleńder jınaǵy Almatynyń basqa kitaphanalarynda bar ma, joq pa bilmeımin. Biraq, Pavlodardyń basqa mýzeılerinen de, kitaphanalarynan da tappaısyz. Aqyn murasyn kórip, tanysamyn deýshilerge esigimiz ashyq, - deıdi Erbol Qaıyrov.
Aıta keterligi, aqynnyń artynda eki roman, bes poema jáne kóptegen óleńder men ocherkteri qaldy. Alǵashqy kitaby - «Adasqan ómir» romany. Ol S.Toraıǵyrov qaıtys bolǵannan keıin 1922 jyly Qazan qalasynda belgili aqyn Bernııaz Kúleevtiń bastamasymen jaryqqa shyqqan.
