Pavlodarǵa shybyn-shirkeıdi áýeden ýlaıtyn 8 ushaq ushyp keldi
PAVLODAR. KAZINFORM - Olar Ertis ózeni jaıylmalaryna bıologııalyq preparat shashyp, qansorǵysh jándikterdi joıady. Bıyl oblys boıynsha áýeden óńdeletin alqaptyń kólemi - 127 myń gektar.
Óńirge shybyn-shirkeıge qarsy kúreske jumyldyrylatyn 8 áýe borty keldi. Olardyń ekeýi Pavlodar qalasynyń alqaptaryn jáne Pavlodar aýdanynyń soltústik bóligin qamtıdy. Taǵy 2 bort Aqsý jaıylmasyn jáne Pavlodar aýdanynyń ońtústik bóligine baǵyttalady. Bir-bir borttan Aqtoǵaı, Tereńkól, Pavlodar jáne Ertis aýdandaryna jiberiledi.
Pavlodar oblysynyń ákimi Asaıyn Baıhanov habarlaǵandaı, ótken jyly mamandar shybyn-shirkeıge qarsy áýeden óńdeý jumystarynyń tıimdiligin 94%-ǵa baǵalady. Bıylǵy jyly ǵylymı súıemeldeý tobynyń usynystary boıynsha óńdeletin alqaptyń aýmaǵy 55,5 myń gektarǵa ulǵaıtyldy.
Qosymsha Pavlodar jáne Ertis aýdandary qamtylyp, áýeden óńdeletin alqaptyń kólemi 127 myń gektardy qurady.
Ǵalymdardyń sózinshe, jaıylmadaǵy taıaz sýda jándikterdiń dernásili tez jetiledi. Sý temperatýrasy 18 gradýsqa jetkende dernásilder belsendi bola túsip, tez damıdy. Osy ýaqytta óńdeý sharalary bastalyp ketýi kerek. Ázirshe jaıylmalardaǵy sýdyń temperatýrasy 10-11 gradýstan aspaı tur.
Ózendi óńdeý jumystarynyń boljamdy merzimderi anyqtaldy. Birinshi kezeń 16-17 mamyrda bastalsa, ekinish kezeń 26-27 mamyrda, al úshinshisi 10-15 maýsymǵa josparlanǵan. Buǵan qosa Ertis ózininiń Belaıa, Podstepka, Teplaıa, Túlki, Tallınka, Karatýn, Orlavka tarmaqtary jáne oblys ortalyǵy men Aqsý qalasynyń mańyndaǵy aǵystar áýeden óńdeledi.
Eske sala keteıik, Elordada masa men shybyn-shirkeıge qarsy kúres bastaldy.
