Pavlodarǵa «Sergek» kameralary qoıylýy múmkin be

PAVLODAR. KAZINFORM - Pavlodarǵa bıyl «Sergek» kameralary qoıylady degen áńgime jurtshylyq arasynda jeldeı esip tur. Bul jańalyq jergilikti kólik júrgizýshilerin abdyratyp qoıdy. Qaptaǵan kameralar kimge unasyn. Máseleni zerdelep kórdik.

Qalt etken qımylyńdy qaǵyp túsiretin «Sergek» kameralar júıesi Pavlodar oblysyna ázirshe jete qoımaǵan. Deı turǵanmen jaqyn kúnderi Pavlodar, Ekibastuz, Aqsý shaharlaryna «Sergek» kameralary ornatyla bastaıdy degen qaýeset tarady.

Óńirde josparlanyp otyrǵan «Qaýipsiz qala» jobasy shynymen «Sergek» kompanııasyna berilýi múmkin be ?

Pavlodar oblysy tsıfrlyq tehnologııalar basqarmasynyń málimetinshe, bıyl qoǵamdyq jáne jol qaýipsizdigin qamtamasyz etý úshin «Qaýipsiz qala» jobasyn iske asyrý josparlanǵan. Joba aıasynda qoǵamdyq oryndarda, kóshe boılarynda, joldarda 5 myńǵa jýyq beınebaqylaý kameralary men jol júrý erejelerin saqtaýǵa baǵyttalǵan apparattyq-baǵdarmalyq keshender (ABK) ornatylýy kerek.

- Pavlodar, Aqsý jáne Ekibastuz qalalary boıynsha 250 jelilik ýchaske, 150 kóshe qıylysy, respýblıkalyq jáne oblystyq mańyzdaǵy avtojoldardyń asa qaýipti 20 ýchaskesi qamtylýy kerek. Bul jerlerde ABK jáne Pavlodar qalasynyń qoǵamdyq oryndarynda 3 myńǵa jýyq jalpy beınebaqylaý kameralary ornatylady. Barlyq beıne kameralar men ABK Pavlodar oblysynyń jedel basqarý ortalyǵyna, oblys ákimdiginiń ahýaldyq-taldaý ortalyǵyna jalǵanady. Sondaı-aq, osy beıne baqylaý júılerine jasandy ıntellekt quraldaryn qoldaný arqyly beıne-analıtıka platformasy jumys isteıtin bolady. Ol izdeýde júrgen azamattardy anyqtap, adamdardyń kóp jınalǵanyn, sondaı-aq tútin shyqsa, qoqys shashylyp jatsa kóre alady. Júıe basqa da keısterimen jabdyqtalǵan, - dep túsindirdi basqarma basshysy Aǵybaı Ámirın.

Qazirgi ýaqytta elimizdiń úlken shaharlaryndaǵy aqparattyq-baǵdarlamalyq keshenderdiń basym bóligi «Sergek» júıesine negizdelgen. Endeshe pavlodarlyq jobany «Sergek» kompanııasy ıelenýi múmkin be?

Basqarma basshysynyń sózinshe, «Qaýipsiz qala» jobasy qandaı da bir belgili aqparattyq júıemen baılanysty emes.

- Elimizde jol qaýipsizdigin qamtamasyz etýge baǵyttalǵan apparattyq-baǵdarlamalyq keshenderdiń alǵashqylary bolyp «Sergek» aqparattyq júıesi engizilgeni málim. Kópshilik barlyq beınebaqylaý kameralaryn «Sergek» dep ataıtyndyǵy sodan da bolar. Biraq jalpy respýblıka boıynsha qalalyq beınebaqylaý júıelerin ornatatyn jáne qyzmet kórsetetin 10-nan asa iri kompanııa bar. Sondyqtan biz ashyq konkýrs jarııalaımyz, oǵan barlyǵy qatysa alady. Konkýrstyq irikteýdiń sharttaryna sáıkes keletin jáne «Goszakup.kz» portalynda faktorlyq upaı ólshemi boıynsha memlekettik satyp alýlar konkýrsynyń qorytyndysy negizinde jeńimpaz dep tanylǵan kez kelgen kompanııa ǵana bizben jumys isteı alady, - dep qosty basqarma basshysy.

Túıindeı aıtqanda, jobaǵa jaýapty memlekettik organ taıaýda «Qaýipsiz qala» jobasyn iske asyrý boıynsha jetkizýshini anyqtaý úshin ashyq konkýrs ótkizýdi josparlap otyr. Ashyq konkýrsqa naryqta osy qyzmet túrin kórsetetin, konkýrstyń sharttaryna saı keletin kez kelgen kompanııa qatysa alady.

Buǵan deıin «Sergek» kompanııasy ShQO jolaýshy kóligi basqarmasymen nelikten sottasyp jatqany týraly jazǵanbyz