Pavlodarǵa kóship kelgen qandastar merekelik shara ótkizdi

NUR-SULTAN. QazAqparat - Búgin Pavlodar oblysy Ýspen aýdanyna qarasty Olgıno aýylynda «Uly dala ónerpazdar kerýeni» atty merekelik shara ótti, dep habarlaıdy QazAqparat tilshisi.

Elbasy Nursultan Ábishuly Nazarbaevtyń «Uly dalanyń jeti qyry» atty maqalasy aıasynda uıymdastyrylǵan oblystyq óner kerýenin Olgıno aýylyndaǵy qandastarymyz erekshe qurmetpen kútip aldy.

Shara aıasynda, jurtshylyqqa qazaqtyń ulttyq taǵamdary usynylyp, aıtys, qyz qýý, qazaq kúresi sekildi ulttyq ónerlerimiz kórsetildi.

«Sońǵy jyldary bul aýylǵa shetelden kóship kelgen aǵaıyndarymyz kóptep qonystana bastady. Qandastarymyz kelgeli aýylymyzda qazaqylyq ta qanat jaıa bastady. Óner kerýeniniń osynda at basyn tireýiniń bir sebebi de osy. Aq jaýlyq orap, kımeshek kıgen apalarymyz jas urpaqqa ulttyq tárbıeniń erekshe úlgisin kórsetti. Eń áýeli alystan kelgen qonaqtardyń aldynan qymyz alyp shyǵyp, kútip aldy. Sondaı-aq, ata-ájelerimiz umytylyp bara jatqan bı túrlerin bılep, eldi qýanyshqa bóledi. Bundaı mádenı sharalar jurtshylyqqa osyndaǵy qonystanǵan qandastarymyzdyń jaı-kúıinen habardar etip, kóship kelgisi keletin otandastarymyzǵa jol ashady dep oılaımyn», - deıdi aýyldyq mádenıet úıiniń dırektory Madına Qabdylqyzy.