Pavlodarǵa Belarýs tramvaılary kesh jetkiziledi - ákim sebebin aıtty
ASTANA. QazAqparat - Pavlodarǵa ótken jyldyń sońynda kelý kerek bolǵan 23 jańa belarýs tramvaı Reseıde fýtboldan ótetin álem chempıonatyna baılanysty keshigýde, dep xabarlaıdy pavlodarnews.
Bul týraly oblys ákimi Bolat Baqaýov qoǵamdyq keńes aldynda bergen esebi kezinde belgili boldy.
«Búgingi tańda Pavlodarda jańa tramvaılardyń paıda bolǵanyn kórip júrmiz. Olar óte yńǵaıly, dybyssyz. Jalpy, tramvaı parkin jańartý jumystary qalaı ótip jatyr?», - dep surady qoǵamdyq keńes múshesi Gaýhar Nyǵmanova.
Aımaq basshysy óńirde tramvaı joldarynyń uzartylatynyn tilge tıek etti.
«Biz 2017 jyl sońyna deıin 23 jańa vagon alýdy kózdep edik. Onyń tórteýi - osynda, ekeýi áli jetpedi. Mamyr aıynda jańa tramvaılar sany 10-ǵa jetedi. Bul kópshiliktiń túrli pikirin týdyrǵan másele. Bıyl Reseıde fýtboldan álem chempıonatynyń ótetinin bilesizder. Osyǵan oraı kórshi memleket bıligi el ishindegi tramvaılardy jańartý úshin Pskov zaýytyna tapsyrma bergen. Belorýssııalyq tramvaılardyń qozǵaltqyshtary tek sol kásiporynda jasalady. Sol sebepti, biz áli de óz kezegimizdi kútýmen qaldyq. Almatyda tramvaıdan bas tartty, Óskemende bul máselege qatysty birqatar máseleler bar. Al, biz ekologııalyq kólik túrin qaıta jańǵyrtyp damytamyz», - dedi Bolat Baqaýov.
Aımaq basshysy qala ishindegi temir joldar jańadan salynyp jatqan «Dostyq» shaǵyn aýdany men áýejaıǵa deıin uzartylatynyn jáne 2019 jyly jolda júrý quny 100 teńge bolýy yqtımal ekenin atap ótti.
