Pavlodarǵa Belarýstan jańa tramvaılardyń sońǵy partııasy jetkizildi
PAVLODAR. QazAqparat - Pavlodarǵa Belarýs Respýblıkasynan jańa tramvaılardyń sońǵy partııasy jetkizildi. Endigide qala turǵyndary men qonaqtaryna 23 jańa vagon qyzmet etetin bolady, dep habarlaıdy QazAqparat.
«Belkommýnmash» kompanııasy jasap shyǵarǵan taǵy eki jańa vagon qalalyq tramvaı deposyn tolyqtyrdy.
Óńir ákimdiginen málim etkendeı, tramvaılardy qabyldap alý sharasyna Pavlodar oblysynyń basshysy Bolat Baqaýov, qala aqsaqaldary men qoǵamdaqstyq ókilderi qatysty.
«Belkommýnmash» kompanııasy servıstik ortalyǵynyń dırektory Aleksandr Shýtov oblysqa tramvaılardan bólek, elektrobýstar men gıbrıdti avtobýstar jetkize alatynyn jetkizdi.
«Pavlodarǵa kirgende bizdiń vagondardy kórgende qatty qýandym. Meniń oıymsha, bul tramvaılar Pavlodar qalasyn odan saıyn kórkeıte tústi. Biz ári qaraı da sizdermen jumys jasap, yntymaqtastyqta bolǵymyz keledi. Onymen birge, bizde jańa usynystar bar. Biz Pavlodarǵa tramvaılar, elektrobýstar jáne gıbrıdti avtobýstar jetkize alamyz. Búgin biz avtonomdy júristegi kólikterdi damytýǵa erekshe kóńil bólemiz. Sebebi bul jyljymaly quramdy satyp alý men paıdalanýda aıtarlyqtaı únemdeýge múmkindik beredi. Eger tramvaılar týraly naqty aıtatyn bolsaq, bul jaǵdaıda elektr jelisin tartpaı-aq, relsterdi ǵana salýǵa bolady», - dedi ol.
Jańa vagondardyń jaılylyǵyn kondýktorlar da sezinip úlgerdi. Kólik kásiporny qyzmetkerleriniń aıtýynsha, jańa tramvaılardaǵy jáne jańa vagondardaǵy basqarý paneli áldeqaıda jaqsy, manevr jasaý úshin artyq qozǵalys jasaýdyń qajeti joq.
«Jańa tramvaılardyń júrisi eski vagondarǵa qaraǵanda birqalypty, sonyń esebinen qozǵalys kezinde eshqandaı kedergiler bolmaıdy. Júrgizýshi kabınasynda kondıtsıoner bar, bul ásirese jaz mezgilinde óte qolaıly. Bizdiń jolaýshylarǵa da jańa tramvaılar unaıdy. Salonda burynǵydaı shýly emes, oryndyqtar áldeqaıda yńǵaıly», - deıdi tramvaı basqarmasynyń júrgizýshisi Elena Evstratova.
Pavlodar oblysynyń ákimi qazirgi tańda óńirde qoǵamdyq kólikterdiń parkin jańartýǵa basa nazar aýdarylatynyn atap ótti.
«Bizde jańa vagondardy jetkizý máselesi boldy. Oǵan obektıvti sebepter bar. Biraq, eń bastysy, jyljymaly quram is júzinde jańartylyp jatyr. Tramvaı – ekologııalyq taza kólik túri. Biz pavlodarlyqtar men qala qonaqtary jaıly qoǵamdyq kólikpen júrýi úshin barynsha kúsh jumsaıtyn bolamyz. Sonymen qatar, bıylǵy jyly avtobýs parkin 76 paıyzǵa deıin jańarttyq. Dızeldi avtobýstarmen qatar qalada 10 elektrobýs júredi. Munda da biz jumysty jalǵastyramyz», – dedi ákim.
