Pavlodarǵa «Arqanyń altyn adamy» jetkizildi
G.N.Potanın atyndaǵy oblystyq tarıhı-ólketaný mýzeıindegi kórmege qaraǵandylyqtar 300-den astam eksponat ákelgen. Qaraǵandy oblystyq tarıhı-ólketaný mýzeıiniń basshysy Erjan Nurmaǵanbetov kórmede qola dáýirinen bastap qazirgi zamanǵa deıingi zattardy tamashalaýǵa bolatynyn atap ótti.
«Kórme Buqar jyraýdyń 350 jyldyǵyna arnalady. Buqar jyraýdyń arab jazýymen qaǵazǵa túsirilgen jyr joldaryn ákeldik. Saryarqanyń qola zamannan bergi tarıhymen tanysýǵa bolady. Oǵan qosa, bıyl «Qoıandy» jármeńkesiniń 170 jyldyǵy bolǵandyqtan, atalmysh tarıhı jármeńkege de qatysty eksponattar bar. «Rýhanı jańǵyrý» baǵdarlamasy boıynsha kıeli oryndardyń respýblıkalyq tizimine Qaraǵandy oblysynan 21 nysan engen. Sol oryndar jaıly da bile alasyzdar»,-dedi Erjan Nurmaǵanbetov.
Kórmedegi aıtýly eksponattardyń biri - 2010 jyly Qaraǵandy oblysy Qarqaraly aýdanynan tabylǵan altyn adamnyń kóshirmesi. «Arqanyń altyn adamy» atanyp ketken tarıhı jádiger Qazaqstannan tabylǵan 4-shi altyn adam. Túpnusqasy Astana qalasyndaǵy ulttyq murajaıda saqtalǵan.
Aıta keter jaıt, Erjan Nurmaǵanbetov G.N.Potanın atyndaǵy oblystyq tarıhı-ólketaný mýzeıine Qaraǵandy oblysy mádenıet basqarmasy basshysynyń kórmeni uıymdastyrýǵa jáne oblystar arasyndaǵy tarıhı-mádenı keńistikterdi nyǵaıtýǵa atsalysqany úshin alǵys hat tabys etti. Sondaı-aq Buqar jyraýdyń 350 jyldyǵyna oraı Qaraǵandy ǵalymdary shyǵarǵan tarıhı tulǵanyń eńbekteri men sol kezdegi aıtqan sózderine taldaý jasalǵan «Urpaqqa ulaǵat» kitabyn syıǵa tartty.
«Arqanyń asyl murasy» kórmesi 1 aıǵa jalǵasady.
