Pavlodardyń jylý jelisinde apat bolyp, 100-den astam úı sýsyz qaldy
PAVLODAR. QazAqparat - «Pavlodar jylý jelileri» JShS qubyrdyń jarylýynan aqqan sýdyń saldaryn joıýda, dep habarlaıdy QazAqparat tilshisi.
«27 tamyz kúni 09 saǵat 34 mınýtta Lomova kóshesiniń boıyndaǵy qalalyq birinshi aýrýhanasyna jaqyn joldyń júretin bóliginde dıametri 720 mıllımetrlik qubyr jarylyp, jylý júıesinde apat boldy», - dedi Pavlodar ákimdiginiń Turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi basshysynyń mindetin atqarýshy Temir Qasqabaev.
Onyń aıtýynsha, apattyń saldarynan jaqyn mańda toqtap turǵan 5 avtokólikke zaqym kelgen.
«30 metr radıýsta shashylǵan asfalt kesekteri 5 jeńil avtokólikke tıip ketip, olarǵa zaqym keltirdi. «Pavlodar jylý jelileri» JShS apattyń saldarymen kúres boıynsha sharalar uıymdastyryp jatyr. Atap aıtqanda, asfaltti alyp tastap, apattyq jaǵdaıdyń saldaryn joıýǵa kiristi», - dedi T. Qasqabaev.
«Pavlodarenergo» kompanııasynyń málimetinshe, mekeme shyǵynnyń kólemi anyqtalǵan boıda zaqym kelgen kólikterge shyǵynnyń ornyn toltyryp beredi.
«Jylý taratý jedel toqtatyldy. Táýlik ishinde zaqymdanǵan bólikterin qaıta qalpyna keltirýge tyrysamyz. Oǵan qosa, jylý júıelerin toltyrý úshin bir-eki táýlik qajet bolady. Atalmysh apatpen baılanysty, ázirge Pavlodardyń ońtústik aýdandaryndaǵy 123 kópqabatty úıde ystyq sý toqtatyldy», - dedi bólim bastyǵynyń mindetin atqarýshy.
Qala ákimdiginiń málimetinshe, sý qubyrynyń jarylýynan kelgen shyǵynnyń kólemi áli anyqtalyp jatyr.
