Pavlodardyń jylý ortalyǵyndaǵy apatty tekserýge táýelsiz sarapshylar tartylady

PAVLODAR. QazAqparat - Pavlodar oblysynyń ákimi Ábilqaıyr Sqaqov 27 qarasha kúni qaladaǵy birinshi jylý ortalyǵynda bolǵan apattyń sebebin anyqtaý maqsatynda keńes ótkizdi, dep habarlaıdy QazAqparat oblysy ákiminiń baspasóz qyzmetine silteme jasap.

Oblystyq Energetıka jáne turǵyn úı-kommýnaldyq sharýashylyq basqarmasynyń aqparaty boıynsha, 27 qarasha kúni ońtústik jylý jelisinde apat bolǵannan keıin osy aýdanda ornalasqan 440 turǵyn úı birden úshinshi jylý elektr ortalyǵyna qosylǵan.

«Jylý jelilsindegi apattyń saldary joıylyp, júıe iske qosylǵannan keıin birinshi jylý elektr ortalyǵynda taǵy eki jerdiń zaqymdalǵany anyqtaldy. Osyǵan baılanysty úshinshi JEO-na ýaqytsha qosylǵan nysandardy birinshi JEO-na keri aýystyrý 28 qarashada saǵat 18:00-ge deıin sozyldy. Monıtorıng aıasynda jylýmen jabdyqtaýdy iske qosýdy baqylaý úshin 44 kóp qabatty úı tańdalyp, onda ár alty saǵat saıyn jylý parametrleri ólshenip jatyr. Alaıda, 21 kóp qabatty úıde jylý berý deńgeıi áli tómen. Jalpy, turǵyn úı ınspektsııasy bólimi jylý jelileriniń ókilderimen birge temperatýralyq rejımdi retteýmen aınalysyp, PIK-termen barlyq máselelerdi pysyqtap jatyr», - dedi Pavlodar ákimi Erjan Imanislám.

«Pavlodarenergo» AQ basshysy Oleg Perfılov atap ótkendeı, apat oryn alǵan jylý jelisi ýchaskesinde eki ret gıdravlıkalyq jáne bir ret temperatýralyq synaq júrgizilgen.

«Tergeý nátıjeleri oqıǵanyń sebepterin kórsetedi. Olardyń negizinde jaǵdaıdyń taǵy qaıtalanýyn boldyrmaıtyn shara qabyldanady», - dep sendirdi ol.

Qazir oqıǵa sebepterin anyqtaý úshin energetıkalyq qadaǵalaý, tótenshe jaǵdaılar jáne basqa da organdar jumyldyryldy. Óńir basshysy bul jumysqa táýelsiz sarapshylardy tartýdy tapsyrdy.

Sonymen qatar ákim pavlodarlyqtardyń úılerindegi jylýdyń jetkiliksizdigine qatysty shaǵymyn muqııat ári jedel qaraýdy talap etti.

«Podezder, úılerge jaýaptylar, sosyn PIK qyzmetkerlerimen júrgiziletin jumystyń barlyǵy qaıda? Áli qatty aıaz bolǵan joq. Temperatýra 40-tan tómen túsken kezde ne isteısizder? Bizdiń barlyq uıymdar ishki taldaý júrgizip, ózderi úshin qorytyndy shyǵarýy tıis», - dep tapsyrdy Ábilqaıyr Sqaqov.

Sondaı-aq óńir basshysy apattyń saldarynan ótken demalys kúnderi jylýsyz qalǵan tutynýshylardyń kommýnaldyq tólemin qaıta eseptep, ol kúnder úshin aqy almaýdy talap etti. «Pavlodarenergo» AQ basshylyǵy muny mindetti túrde oryndaıtynyn aıtty.

Eske