Pavlodardyń jasymyǵy Túrkııaǵa eskporttalmaq
Taraptar oblystyq kásipkerler palatasynda kezdesti. Aımaq basshysy mártebeli meımanmen suhbat barysynda Pavlodar oblysy men Túrkııa memleketi arasyndaǵy taýar aınalymy 64 mln dollarǵa jetkenin tilge tıek etti. Onyń ishinde alıýmınıı eksporty 61 mln dollarǵa bolǵan.
Sondaı-aq, ol Ertis óńiri túrkııalyq tarappen iskerlik qarym-qatynasqa múddeli ekendigin aıtyp, ónerkásipte, týrızmde, medıtsına men aýyl sharýashylyǵy salasynda áriptestik ornatýǵa usynys bildirdi.
«Túrkııaǵa kóp mólsherde jasymyq esporttalady, - dedi Bolat Baqaýov. - Bizdegi aqparat boıynsha tek Kanadanyń ózi jyl saıyn 80 myń tonna jetkizip otyr. Sapa jaǵynan bizdiń jasymyq kanadalyq daqyldan kem túspeıdi, pavlodarlyq aýyl sharýashylyǵy taýar óndirýshileri bul baǵytta básekelestikke túse alady. Biz Túrkııa eline bul dándi daqyldy jetkizýge ázirmiz».
Budan bólek, oblys ákimi mártebeli meımandarǵa Pavlodarda bes juldyzdy qonaq úı keshenin salýǵa ınvestıtsııa salýdy usyndy. Aımaq basshysynyń sózine qaraǵanda, jergilikti bılik jýyrda salynatyn «Dostyq» yqsham aýdanynan jer telimin shuǵyl túrde bólip berýge ázir. Túrkııalyq qonaqtar barlyq usynystardy qaraýǵa ýáde berdi. «Kezinde arab elderi, Eýropa jáne Afrıka memleketterimen kóptegen iskerlik kelisimder jasastyq, - dedi bıznes-hanym Nezaket Emıne Atasoı. - Endi Ortalyq Azııa elderimen baılanysty damytqymyz keledi. Qazaqstan negizgi áriptesimiz bolatyndyǵyna senimdimin. Biz ónerkásiptiń barlyq sektorynda, qurlys, týrızim salasynda birlese jumys isteýge daıynbyz. Al, pavlodarlyq jasymyqqa keler bolsaq, bul óte mańyzdy usynys. Túrkııaǵa bara sala bul jobaǵa myqtap kirisemiz. Sondaı-aq, Pavlodardan Túrkııaǵa jetkiziletin qalaıy kólemin arttyrýǵa qoldaý kórsetemiz».
Kezdesý sońynda Nezaket Emıne Atasoı iskerlik qarym-qatynasty odan ári damytýdyń jaı-japsaryn talqylaýǵa shaqyrdy.