Pavlodardyń sanavıatsııasy kúsheıtilgen jumys rejımine kóshti
«Pavlodardyń sanıtarlyq avıatsııasy kúsheıtilgen jumys rejımine kóshti», – deıdi Pavlodar oblystyq jedel járdem stantsııasynyń baspasóz qyzmeti.
Naýqastardyń jaǵdaıynyń nasharlaýyna jol bermeý maqsatynda sanıtarlyq avıatsııa reanımobılge qaraǵanda áýe kemelerin jıi qoldanýǵa tyrysady.
Jaqynda sanavıatsııa dárigerleri Aqqýly aýdany men Ekibastuz qalasyna eki ret ushyp shyqty. Oblystyq jedel járdem stantsııasynyń quramyna kiretin sanavıatsııa sońǵy aılarda jol-kólik oqıǵalary saldarynan, kóshelerde jáne turmystyq jaǵdaılarda jaraqat alýǵa baılanysty qońyraýlar jıi túsetindigin aıtty. Budan bólek, sanıtarııalyq avıatsııanyń kómegi shala týǵan jáne jańa týǵan balalarǵa, sondaı-aq júkti áıelderge jıi qajet bolyp jatady.
«Biz patsıentterdi tasymaldaý ýaqytyn azaıtý jáne olardyń densaýlyǵyn saqtaý úshin medıtsına qyzmetkerlerin áýe kóligimen baǵyttaýǵa tyrysamyz, – dedi Pavlodar sanıtarlyq avıatsııa bóliminiń meńgerýshisi Almagúl Besembınova. – Qyzmetimizdiń shtatyna óńirdiń joǵary bilikti dárigerleri kiredi. Olar turǵylyqty jer boıynsha da, tasymaldaý kezinde de kómek kórsete alady».
Jeltoqsan aıynyń basynan bastap sanıtarlyq avıatsııa jeti ret kómekke ushyp shyqty. Bir kún buryn áýe kemesi Pavlodarǵa birden eki patsıentti jetkizdi.
Aqqýly aýylynan sýbarahnoıdaldyq qan quıylýmen 47 jastaǵy áıel jetkizildi. Al Ekibastuzda mıokard ınfarktisin basynan ótkergen 60 jastaǵy naýqasqa sanavıatsııa qyzmetkerleriniń kómegi qajet boldy: trombolıtıkalyq terapııa men kardıogendi shoktan keıin ony shuǵyl túrde oblystyq kardıologııalyq ortalyqqa jetkizý kerek boldy», – dep tolyqtyrdy Pavlodar oblystyq jedel járdem stantsııasynyń baspasóz qyzmeti. Pavlodar sanıtarııalyq avıatsııasynyń qyzmetinde eki áýe kemesi bar: AN-2 ushaǵy jáne ES-145 tikushaǵy».