Pavlodardyń Ertis aýdanynda 24 páterli úsh úı paıdalanýǵa berildi
Alǵashqy qonys ıelerine páter kiltteri Táýelsizdik kúni tabystaldy.
Turǵyn úıge medıtsına qyzmetkerleri, pedagog, polıtsııa qyzmetkerleri jáne t.b. ıe boldy. Pavlodar oblysynyń ákimi Ábilqaıyr Sqaqov aýyl turǵyndaryn qos mereke — qonys toıymen jáne Táýelsizdik kúnimen quttyqtap, Ertis aýylynda eki qabatty úsh úıdiń tapsyrylýynyń arqasynda aýdan boıynsha turǵyn úı kezegi 30 paıyzǵa azaıǵanyn atap ótti.
«Qurylysshylar jumysty ýaqytynda tapsyryp, Ertis aýylynyń turǵyndarynyń kóńil-kúıin kóterip tastady. Barlyq jańa qonystanýshylarǵa myqty densaýlyq tileımin. Týǵan ólkeńizdiń jáne búkil elimizdiń ıgiligi úshin budan ári de eńbek etetinderińizge senimdimin», - dedi óńir basshysy.
Jańa eki qabatty úılerdegi páter kiltterin kópbalaly otbasylar da aldy. Olardyń qatarynda úsh ul, úsh qyz tárbıelep otyrǵan Saltanat pen Jolaman Órtenbaevtar da bar. Erli-zaıyptylar áli kúnge deıin jaıly úıge qonystanǵanyna sene alar emes. Buǵan deıin bul otbasy jalǵa alynǵan jer úıde turyp kelgen bolatyn.
«Jańa páterde barlyq jaǵdaı jasalǵan – bul eń mańyzdy artyqshylyq. Jer úıde bólmeni jyly ustaýǵa, únemi pesh jaǵýǵa, kómirge, otynǵa kóp aqsha jumsaýǵa týra keledi. Endi mundaı másele joq», - deıdi Órtenbaevtar.
Ertis aýylynda úsh 24 páterli úıden turatyn keshen «Jumyspen qamtýdyń jol kartasy» baǵdarlamasy boıynsha salyndy. Aýdan ortalyǵynyń turǵyndaryna páterler keıin satyp alý quqyǵymen jalǵa berilip otyr.
Sýretti túsirgen Valerıı Býgaev
