Pavlodardyń jeke sektorlary men áleýmettik nysandary úshin 342 myń tonna kómir jetkizildi

PAVLODAR. KAZINFORM — Qazirgi ýaqytta temirjol tuıyqtarynda jalpy kólemi 46,1 myń tonna kómir saqtalyp tur. Onyń 35 myń tonnasy Pavlodar qalasynda.

Ertis-Baıan óńirinde kún sýytyp, kópshilik qysqy otynyn qamdaı bastady. Jalpy qazirgi ýaqytqa deıin 342 myń tonna qatty otyn jetkizilgen. Bul — aldaǵy qysta qajet otynnyń 59 paıyzy. Temirjol tuıyqtarynda jalpy kólemi 46,1 myń tonna kómir saqtalyp tur. 

— Áleýmettik sala nysandary jáne oblys halqyn qatty otynmen qamtamasyz etý úshin eldi mekenderge 342 myń tonna qatty otyn jetkizildi. Oblys aýmaǵyndaǵy temirjol tuıyqtarynda 46,1 myń tonna, Pavlodar qalasynda 35 myń tonna kómir bar. Al óńirdegi áleýmettik mekemeler men jeke sektorlar úshin aldaǵy qysqa 536 myń tonna otyn qajet, - dep habarlady Kazinform tilshisine Pavlodar oblysy energetıka jáne turǵyn úı-kommýnaldyq sharýashylyq basqarmasynyń baspasóz qyzmetinen.

Buǵan deıin Pavlodar oblysyndaǵy kómir baǵasy ótken jyldyń deńgeıinde saqtalyp turǵan jazǵanbyz.

Óńirde kómir óndiretin 6 kenish bar. Atap aıtqanda, «Bogatyr-Kómir» JShS, «Maıkýben-Vest» JShS, «Gamma Taldykól» JShS, «Gamma Sarykól» JShS, «Angrensor Energo» JShS, «Shyǵys kenishi» JShS. Halyq negizinen jergilikti kenishter arasynda «Maıkóbe» kenishiniń kómirin qup kóretini jasyryn emes. Atalǵan kompanııada búginde kómirdiń bir tonnasy 8,3 myń teńgeden bosatylyp jatyr. Al «Bogatyr» kenishinde tonnasy 4,2 myń teńge turady. Oblys boıynsha, sonyń ishinde Pavlodar qalasynda kómir satylatyn temirjol tuıyqtary bar. Búgingi tańda oblysta kómir jetkizýmen 10 iri kómir operatory aınalysady.