Pavlodardyń tórt aýdanynda turmystyq qaldyqqa arnalǵan polıgondar salynady
PAVLODAR. KAZINFORM — Ár qoqys polıgonynyń quny 1 mlrd teńgeden asyp ketýi múmkin. Tıisti qarajat bólinse, Ertis, Tereńkól, Baıanaýyl jáne Maıqaıyń eldi mekenderinde qurylystar bastalady.
Óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Saǵyn Tóleýtaevtyń aıtýynsha, qazirgi ýaqytta oblys boıynsha nebári 3 turmystyq qaldyqtar polıgony ekologııalyq normatıvterge sáıkes keledi.
— Adam sany kóp iri eldi mekenderde zamanǵa saı qoqys polıgondaryn salý josparlanyp otyr. Bir jobany iske asyrýdyń ortasha quny shamamen 1 mlrd teńgeden asady. Oǵan shuńqyr, qoqys suryptaý jelisi jáne basqa da qymbat elementter kiredi. Ókinishke qaraı, barlyq talaptarǵa saı polıgondardy árbir aýyldyq eldi mekende salý óte qymbat jáne tıimsiz bolady. Sondyqtan búginde biz zańnamalyq deńgeıde aýyldardaǵy polıgondarǵa qoıylatyn talaptardy jeńildetýdi surap otyrmyz. Alǵashqy tórt joba iske asqan soń ózge de aýdandarmen de aınalysamyz, — deıdi ol.
Budan bólek, «Jasyl Damý» AQ baǵdarlamasy aıasynda kommýnaldyq qaldyqtardy basqarý salasynda taǵy tórt jobany qarjylandyrý josparlanǵan. Atap aıtqanda, Pavlodarda qoqys óńdeý keshenin salý, plastıkalyq juqa qabyrǵaly qatty qaldyqtardy óńdeýge arnalǵan jabdyqtardy satyp alý, tsellıýlozadan jáne qaıta óńdelgen makýlatýradan qaǵaz, karton óndiretin zaýyt salý, sondaı-aq paıdalanylǵan akkýmýlıatorlyq batareıalardy jınaý, saqtaý, tasymaldaý jáne óńdeý jobalary. Bulardyń barlyǵy ázirshe qaǵaz júzinde.
Eske sala keteıik, Pavlodar oblysynda ruqsat etilmegen jerge qoqys tastalǵany úshin 12 ákim jazalandy.