Pavlodardyń ekologııalyq kartasy: qaı qala aýany kóbirek lastaıdy
PAVLODAR. KAZINFORM — Ertis-Baıan óńirinde aýaǵa shyǵarylatyn lastaýshy zattardyń jartysyna jýyǵy Ekibastuz qalasyna tıesili. Oǵan negizinen alyp kómir kenishteri men elektr stansalary sebepker.
Atmosferaǵa shyǵarylatyn emıssııalardyń eń úlken úlesi Pavlodar oblysyndaǵy iri kásiporyndarǵa tıesili. Olar aýany lastaıtyn shyǵaryndylardyń shamamen 95%-yn qalyptastyrady.
— Aýaǵa shyǵarylatyn lastaýshy zattardyń jalpy kólemi oblystyń úsh qalasynda ornalasqan ónerkásiptik kásiporyndar esebinen qalyptasady. Atap aıtqanda, naqty shyǵaryndylardyń shamamen 45%-y Ekibastuz qalasyna, 26%-y Aqsý qalasyna jáne 24%-y Pavlodar qalasyna tıesili. Oblystyń ózge aýdandary shyǵaryndylardyń 5%-yn ǵana beredi, — dep habarlady Kazinform tilshisine óńirlik ekologııa departamentiniń basshysy Qanat Musaparbekov.
2025 jyly oblys boıynsha shyǵaryndylar lımıti 901,54 myń tonna bolsa, onyń ishinde Pavlodar qalasy — 225,29 myń tonna, Ekibastuz qalasy — 386,85 myń tonna, Aqsý qalasy 278,6 myń tonna lastaýshy zattar shyǵarǵan. Al 2024 jyly mundaı shyǵaryndylar lımıti 926,2 myń bolǵan. Shyǵaryndylar lımıtiniń bir jylda 24,6 myń tonnaǵa tómendeýi kásiporyndardyń ekologııalyq jobalardy belsene iske asyrýyna baılanysty bolyp otyr.
— Oblystyń ónerkásiptik kásiporyndary shyǵaratyn lastaýshy zattardyń naqty kólemi uzaq jyl 700 myń tonnadan asyp kelgeni málim. Deıturǵanmen taldaý jalpy emıssııalar kóleminiń tómendeý úrdisin baıqatyp otyr. Sońǵy bes jyldaǵy shyǵaryndylar dınamıkasy kelesideı: 2021 jyly — 730,2 myń tonna, 2022 jyly — 726,5 myń tonna, 2023 jyly — 703,97 myń tonna, 2024 jyly — 697,47 myń tonna, 2025 jyly — 669,9 myń tonna. Osylaısha, bes jyl ishinde naqty shyǵaryndylar kólemi 60,3 myń tonnaǵa nemese 8%-ǵa tómendedi, — dep qosty departament basshysy.
Al «Qazgıdromet» RMK memlekettik ekologııalyq monıtorınginiń derekterine súıensek, Pavlodar oblysyndaǵy, sonyń ishinde Pavlodar qalasynyń atmosferalyq aýasynyń sapasy atmosferanyń lastaný ındeksi (ALI) boıynsha tómen deńgeıde dep baǵalanady. 2021 jyldan beri bul kórsetkish ALI-3 deńgeıinen kóterilip kórmegen.
Eske sala keteıik, Qazaqstanda 2027 jyldan bastap avtojoldardyń ekologııalyq qaýipsizdigine biryńǵaı talap engiziledi.
