Pavlodardyń bir aýylynda buralqy ıtter usaq malǵa shaýyp jatyr
PAVLODAR. KAZINFORM - Aqtoǵaı aýylynda qańǵybas ıtter qozy-laqtardy alqymdap ketken. Tórt túlikpen kúneltip otyrǵan turǵyndar kúni-túni mal qoralaryn kúzetip álek.
Pavlodar oblysy Aqtoǵaı aýdanynyń turǵyndarynan buralqy ıtterdiń malǵa shabýyldaǵany týraly shaǵymdar jıilep ketken. Aýdan ortalyǵynda bir top ıt jurttyń qorajaılaryna kirip, qozy-laqtaryn qyryp jatyr. Turǵyndardyń aıtýynsha, qaraýsyz júrgen janýarlar buzaý-taıynshaǵa deıin aýyz salatyn kórinedi.
- Osydan on shaqty kún buryn kórshimniń qorasyna kirip, 4 qozysyn jaıratyp salǵan. Keshe bizdiń úıdiń malyna shabýyldap, bir qozymyzdy jep ketti. Aıdyń-kúnniń amanynda qańǵybas ıtterden qorlyq kórip otyrmyz. Veterınarııalyq stansanyń qyzmetkerleri kórshimniń úıine kelip, ólgen maldan synama alyp ketken eken. Sodan habar joq. Anaý ıtter bizdiń úıimizdi torýyldap júr. Balalarymyz mektepten qarańǵyda qaıtady. Endi solardyń ómiri úshin alańdaı bastadyq. Jaýapty organdar janýarlardy aýlap, kózin qurtpasa, malymyz shyǵyndala beretini anyq. Al ólgen maldyń qunyn bizge eshkim ótep bermeıtini anyq,-dep qynjylady aýyl turǵyny Márýa Konselhan.
Turǵynnyń sózinshe, toptanyp júrgen 4-5 buralqy janýar adamnan qoryqpaıdy. Aýyldyń shetkeri úılerin jaǵalap, reti kelse malǵa shabýǵa daıyn júredi eken.
Óńirlik veterınarııa basqarmasy veterınarııa jáne lıtsenzııalaý bóliminiń basshysy Ǵalym Beısenovtiń aıtýynsha, atalǵan aýdan basynda turatyn azamattardan ázirshe ondaı shaǵym túspegen.
- Áleýmettik jelide taraǵan vıdeodan usaq maldardyń ólip jatqanyn kórdik. Biraq mal ıeleri bizben baılanysqa shyqpady ári derekterdi naqtylaı almaı otyrmyz. Eger shaǵym tirkelse, maldardan synama alynyp, ıtterde qandaı da bir aýrýdyń bar-joqtyǵy tekseriledi. Algorıtmge sáıkes odan ári qańǵybas janýarlardy aýlaý júrgiziledi. Ótken jyly qańǵybas ıtterdiń malǵa shabýyldaǵany týraly derekter tirkeldi. Al bıyl ázirshe ondaı derekter resmı túrde anyqtalǵan joq, - deıdi ol.
Eske sala keteıik, Óskemende bir aptada 11 adamdy ıt qapty.