Pavlodardyń aýyldyq jerlerinde shybyn-shirkeıdi ýlaý jumystary bastaldy
PAVLODAR. KAZINFORM — Óńirde kún jyly bolýyna baılanysty shybyn-shirkeı oıana bastaǵany baıqalyp otyr. Ǵylymı toptyń usynystary boıynsha Pavlodar aýdanynda qansorǵysh jándikterge qarsy dezınsektsııa jumystary bastalyp ketken.
Bul týraly Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasynan habarlady.
— Pavlodar aýdanynda qansorǵysh jándikterge qarsy josparly dezınsektsııa jumystarynyń bastalǵanyn habarlaımyz. Mamandar aýyldar mańynda tas jol boıyndaǵy ýaqytsha sý aıdyndaryn óńdeýge kiristi. Jumystar ǵylymı toptyń usynystary boıynsha jáne Pavlodar aýdany ákimdiginiń baqylaýymen júrgizilip jatyr, — dep habarlady basqarmadan.
Pavlodar aýdany Ertis ózeni boıynda ornalasqan. Bul aýmaqtyń turǵyndary kóktem men jazda shybyn-shirkeıdiń shabýylynda qalady.
Eske sala keteıik, bıyl Pavlodar óńirinde shybyn-shirkeıdi ýlaýǵa drondar jumyldyrylady.
Qoldanylatyn bıologııalyq preparattardyń kólemi ótken jylmen salystyrǵanda birden 51 paıyzǵa artady. Al áýeden óńdeletin alqaptardyń kólemi 172 myń gektarǵa deıin jetkiziledi dep josparlanǵan. Sondaı-aq ózen arqyly óńdeý kólemi 52 paıyzǵa ulǵaıady.
