Pavlodardyń aýyl sharýashylyǵy salasynda kadr tapshy
PAVLODAR. KAZINFORM — Oblystyń aýyl sharýashylyǵy salasynda jeti myńdaı kásiporyn bar. Eńbek uıymdarynda traktorıst, mashınıst, operatorlar jáne agronomdar men basqa da jumysshy kadrlardyń tapshylyǵy baıqalyp otyr.
Óńirlik aýyl sharýashylyǵy basqarmasynyń bólim basshysy Áset Baımanqulovtyń aıtýynsha, Pavlodar oblysynyń agroónerkásip salasynda maman tapshylyǵy bar.
— Atap aıtqanda, jumysshy mamandyqtar boıynsha traktorıst, mashınıst, operatorlar jáne agronomdar jetispeıdi. Qara jumysqa adam tabylǵanymen, tehnıkanyń tilin biletin kásibı maman az. Keı qojalyqta elektrondy baqtashy júıesi ornatylyp jatyr. Jylqyshynyń ózi kólikpen júredi. Jalaqysy da jaqsy tólenedi. Biraq jastardyń bul kásipke qyzyǵýshylyǵy az. Jergilikti sharýalar mal basyn kóbeıtip, egin egýmen aınalysady. Aýyl sharýashylyǵy ónimderin óńdep, eksportqa shyǵaryp otyrǵandary bar. Alaıda kásipti keńeıtýge kadr tapshylyǵy qolbaılaý bolyp otyr, — deıdi ol.
Aýyl sharýashylyǵynda myńnan astam jumys orny ashylady degen jospar bar. Ári sharýashylyqtar qazir tsıfrlyq tehnıkalardy qoldana bastaǵan. Biraq onyń tilin biletin jastardyń aýylǵa barǵysy joq.
Keıbir sharýashylyqtar jumysshylardyń eńbekaqysyn 700 myń teńgege deıin kótergen. Soǵan qaramastan jas kadrlardyń yntasy ázirshe tómen bolyp tur.
Aldaǵy eki jylda óńirde 32 ınvestıtsııalyq jobanyń júzege asatynyn eskersek, bilikti mamandarǵa suranys tipti artady degen sóz.
Eske sala keteıik, elimizde túlekterdiń 40 paıyzy mamandyq boıynsha jumys istemeıdi.
