Pavlodardyń 8 eldi mekenine shekaralas ózender men sý qoımalary qaýip tóndirip tur
PAVLODAR. KAZINFORM - Sileti sý qoımasy men Aşysý ózeni tasysa, Baıanaýyl men Aqtoǵaı aýdandarynyń birneshe aýylyna sý kirýi yqtımal.
Aqmola oblysynyń Sileti sý qoımasyna, sondaı-aq, Pavlodar oblysy Aqtoǵaı aýdanynyń aýmaǵyna áýeden barlaý jasaldy.
- Búgingi tańda sý qoımasynda jınalǵan sýdyń kólemi 201 mln tekshe metr nemese 87%. Aqmola oblysyndaǵy Sileti sý qoımasynan jiberiletin sýdyń ulǵaıý qaýpine baılanysty bıylǵy sý tasqyny maýsymynda Sholaqsor aýylyn sý basý múmkin degen qaýip bar. Barlyq sý basý qaýpi bar ýchaskeler tekserilip, Sileti ózeninde sanıtarlyq sý jiberý daıyndyǵy, sondaı-aq, barlyq sý tasqynyna qarsy is-sharalardy ótkizý úshin kelgen kúshter men azamattyq qorǵaý qyzmeti toptarynyń daıyndyǵy zerdelendi, - dep habarlady oblys ákiminiń baspasóz qyzmetinen.
Buǵan deıin Baıanaýyl aýdanynyń Qaraǵandy oblysymen shekaralasatyn aýyldary da tekserilgen. Baıanaýyl aýdanyndaǵy qardyń qalyńdyǵy 21 santımetr jáne bul ótken jylmen salystyrǵanda 8 santımetrge kóp. Qaraǵandy oblysynyń Buqar jyraý aýdany men Baıanaýyl aýdany Sátbaev aýyldyq okrýginiń shekara mańy aýmaǵynda jınalǵan qardyń úlken qory qarqyndy erigen kezde, sondaı-aq, «Aqjar» bógeti tolyp, sý jiberilgen jaǵdaıda aýdannyń 7 eldi mekenin sý basý qaýpi tónýi múmkin.
- «Aqjar» bógetinen aǵyp keletin sýdyń negizgi arnasy Q.Sátbaev aýylynan 10-15 km jerde «Qaratoqa» bógetinen aǵyp keletin sýdyń arnasymen qosylady, osyǵan baılanysty jaqyn mańdaǵy M.Júsip, Jańatilek, Kókdombaq, Q.Sátbaev, M.Shorman aýyldarynyń mańynda gıdroposttar jabdyqtalǵan. Áýeden barlaýdyń nátıjesinde Qaraǵandy oblysynyń «Aqjar» bógetindegi jaǵdaıǵa monıtorıng júrgizildi. Jobalyq kólemi 4,2 mln tekshe metr bolatyn sý qoımasy búgingi kúni 71% tolǵan. «Qaratoqa» bógeti Buqar jyraý aýylynan 25 km qashyqtyqta ornalasqan. 3 mln tekshe metr sý sııatyn bul sý qoımasy búginde 33% tolǵan, - dep habarlady oblys ákiminiń baspasóz qyzmetinen.
Mamandardyń boljamy boıynsha, oblys aýmaǵyndaǵy sý tasqyny kezeńi 2 kezeńde ótedi: naýryzdyń 2-3-shi onkúndiginde qar erıdi, al sáýirdiń 2-3-shi onkúndiginde Joǵarǵy Ertis kaskadynan sý jiberiledi.
Eske sala keteıik, bıyl Ertis jaıylmalarynyń 80%-dan astamyn sýlandyrýǵa múmkindik bar.