Pavlodardyń 8 aımaǵynda aýyzsý sapasy normatıvke saı kelmeıdi
PAVLODAR. KAZINFORM - Epıdemıologtar aýyzsýmen jabdyqtaý nysandarynan sanıtarııalyq-hımııalyq kórsetkishteri boıynsha 642 synama alǵan. Nátıjesinde 35 sý synamasynyń normatıvteri erejege saı bolmaı shyqty.
Pavlodar oblysy Sanıtarııalyq-epıdemıologııalyq baqylaý departamenti óńirdegi aýyzsýmen jabdyqtaý nysandaryn jappaı tekserip jatyr. Kóptegen eldi mekenderde sanıtarııalyq-hımııalyq jáne mıkrobılogııalyq kórsetkishter normadan asyp ketken.
«Organoleptıkalyq jáne sanıtarııalyq-hımııalyq kórsetkishter boıynsha Aqtoǵaı, Ertis, Maı, Pavlodar, Aqqýly aýdanynda jáne Pavlodar, Ekibastuz, Aqsý qalalarynyń aýyldyq aımaqtarynda sáıkessizdikter anyqtaldy. Aýyzsýmen jabdyqtaý nysandarynda sanıtarııalyq-hımııalyq kórsetkishteri boıynsha 642 synama zertteldi. Nátıjesinde 35 sý synamasy normatıvterge sáıkes kelmedi. Al mıkrobıologııalyq kórsetkishteri boıynsha zerttelgen 649 sý synamasynyń 7-ýeinde sanıtarııalyq erejelerdiń buzylǵany tirkeldi», - dep habarlady departamentten.
Mamandar buǵan qosa atmosferalyq aýany sanıtarııalyq-hımııalyq kórsetkishteri boıynsha zerttep, 3 synamada shekti ruqsat etilgen kontsentratsııanyń asyp ketkeni anyqtaldy. Mysaly, Ekibastuz qalasynyń sanıtarııalyq-qorǵaý aımaǵynyń shekarasynda kúkirt dıoksıdiniń joǵary kórsetkishteri tirkelgen.
