Pavlodardy jaılaǵan jaǵymsyz ıis turǵyndardy alańdatyp qoıdy

PAVLODAR. KAZINFORM -Demalys kúnderi oblys ortalyǵynyń turǵyndary jaǵymsyz ıiske shaǵymdandy. Ekologııa departamenti aýany lastaǵysh zattardyń shekti mólsherden kóbeımegenin aıtyp otyr.

Pavlodardy senbi-jeksenbi kúnderi jaǵymsyz ıis jaılady. Ásirese, qolqany atatyn ıis shahardyń ortalyq bóliginde erekshe sezilgen. Turǵyndardan bul jaıtqa qatysty shaǵymdar jıilegen. 

Óńirlik ekologııa departamenti qala turǵyndary tarapynan shaǵymdardyń bolǵanyn rastady.

«Qazgıdromet» qaladaǵy aýaǵa únemi monıtorıng júrgizedi. Biraq mekeme mamandary aýany lastaýshy zattardyń shekti ruqsat etilgen mólsherden asyp ketýi tirkelmegenin habarlady.

- Monıtorıng qala boıynsha 7 statsıonarly bekette júrgiziledi. Olar Máskeý, 12/1, Aımanov 26/1, Lomov, Kazpravda, Estaı 54, Zaton 39, General Dúısenov jáne Toraıǵyrov kósheleriniń qıylysyndaǵy jerlerde ornalasqan. «Qazgıdromettiń» málimetteri boıynsha 2025 jylǵy 2-4 tamyz kúnderi atalǵan beketterde aýany lastaýshy zattardyń shekti ruqsat etilgen mólsherden asyp ketýi tirkelmegen,-dep habarlady ekologııa departamentinen.

Buǵan qosa departamenttiń ekologııalyq jyljymaly zerthanasy Ýsolka, Hımqalashyq, Ortalyq ámbebap dúken aýdany, Nazarbaev dańǵyly men Tolstoı kósheleri qıylysy, Pavlodar munaı-hımııa zaýytynyń sanıtarlyq-qorǵaý aımaǵyna kóshpeli monıtorıng júrgizip, atmosferalyq aýanyń quramyn teksergen. Qazirgi ýaqytta mamandar shahardaǵy aýanyń sapasyn qadaǵalaý jumystary jalǵasyp jatqanyna sendirdi. Shekti-ruqsat etilgen kontsentratsııadan asqan jaǵdaılar tirkelse, ınspektorlyq den qoıý sharalary bastalatynyn málim etti.

Eske sala keteıik, Qaraǵandyda aýyl turǵyndary ekologııalyq qaýipke tosqaýyl qoıdy.