«Pavlodardan» shyqqan 100-shaqty ónim álemniń damyǵan memleketterine de taraıdy
NUR-SULTAN. QazAqparat - «Pavlodar» arnaıy ekonomıkalyq aımaǵynda 100-den astam ónim túri shyǵarylady, dep habarlaıdy QazAqparat tilshisi.
Indýstrııa jáne ınfraqurylymdyq damý mınıstrliginiń málimetinshe, óndirilgen taýarlar Japonııa, Ońtústik Koreıa, QHR, GFR, Italııa, Polsha, Iran, Ózbekstan, Tájikstan, Qyrǵyz jáne Reseı memleketterine eksporttalady.
«Pavlodar» arnaıy ekonomıkalyq aımaǵy 2011 jyly quryldy. Investıtsııalyq portfel 342,6 mlrd teńgeni quraıtyn 50 jobadan turady. AEA kásiporyndarynda 1805 jumys orny ashylyp, 84,6 mlrd teńge ınvestıtsııalanǵan. Onyń ishinde, 21 mlrd teńge - sheteldik ınvestıtsııalar. Jalpy ekonomıkalyq aımaqta 208,6 mlrd teńgeniń ónimi óndirilgen. Bul rette daıyn taýarlar eksportynyń kólemi 103 mlrd teńgeni quraıdy. Búgingi tańda «Pavlodar» AEA – «World Free Zones Organization» Dúnıejúzilik erkin aımaqtar uıymynyń tolyq quqyqty múshesi jáne Ortalyq Azııa elderi boıynsha óńirlik keńse mártebesine ıe», - delingen aqparatta.
«Pavlodar» arnaıy ekonomıkalyq aımaǵynda hımııa, munaı hımııasy, metallýrgııa jáne óńdeý ónerkásibi salalaryndaǵy jobalardy iske asyrýǵa baǵdarlanǵan ınvestorlar úshin erekshe quqyqtyq rejım belgilengen. Máselen, bul jerde kaýstıkalyq soda, hlor, tuz qyshqyly jáne natrıı gıpohlorıtin, avtokólikterge arnalǵan jeńil balqıtyn alıýmınıı dıskilerin, motor maılary men maılaýǵa arnalǵan materıaldardy, belsendirilgen kómir óndirýshileri, basqa da óndiris oryndary nátıjeli jumys isteıdi.
