Pavlodardan shaǵym kóp keledi. Erlan Turǵymbaev departament basshysyna sálem joldady
NUR-SULTAN. QazAqparat – QR Іshki ister mınıstri Erlan Turǵymbaev Nur Otan partııasynda azamattardy qabyldaý barysynda Pavlodar oblysynyń polıtsııa departamentiniń jumysyn synǵa aldy, dep habarlaıdy QazAqparat tilshisi.
Úıdegi gaz ballonynyń jarylysy kezinde anasynan aıyrylǵan pavlodarlyq Naılıan Imasheva adam ómirin jalmaǵan jarylystyń mán-jaıyna polıtsııa qyzmetkerleriniń salǵyrt qarap otyrǵany týraly aıtyp shaǵymdandy. Onyń aıtýynsha, atalmysh oqıǵaǵa qatysty kisi ólimi boıynsha emes, bótenniń múlkin zaqymdaý faktisi boıynsha tergeý júrgizilgen.
«2018 jyldyń jeltoqsanynda bizdiń úıde gaz ballony jarylǵan bolatyn. Biz ballondy janarmaı beketinen toltyryp ákelgenbiz. Qoldanyp ta úlgermedik. Kenet ol jaryldy. Jarylys sońy órtke ulasyp, anamnyń denesiniń 95 paıyzyn, ákemdi 73 paıyz, ózimdi 73 paıyz, qyzymdy 60 paıyz kúıik shaldy. Bárimiz jansaqtaý bólimine tústik. Úshinshi kúni anam ómirden ótti. Osy oqıǵa qatysty «Bótenniń múlkin joıý jáne búldirý» degen 204-bap boıynsha qylmystyq is qozǵaldy», - dedi turǵyn.
Onyń sózine qaraǵanda, qozǵalyp jatqan iske kúıik shalyp qaıtys bolǵan áke-sheshesi kirmeı qalǵan.
«Іste qaza bolǵan ákem men anam joq. Kináli de, joq, bap ta joq. Polıtsııa qyzmetkerleri Ekibastuz qalasyna suraý salǵanyn, olardyń qaraýynda 120 qujat jatqanyn, onyń barlyǵyn jatqa bilý múmkin emes ekenin aıtty. Keıin bizdi polıtsııa basshysy shaqyryp, is azamattyq sotqa beriledi dedi», - dep shaǵymdandy ol.
Mınıstr Erlan Turǵymbaev ótinish bildirgenderdi tyńdap, isti tekserip, tirkeýdi tapsyrdy.
«Іshki ister mınıstrliginiń Tergeý departamentine barasyz. Bizde barlyq is tekserilip, tirkeledi. Oqıǵa ornyna da adamdar jiberip, tekserý qajet. Órt-tehnıkalyq saraptamany qaıta kóterý kerek. Qatysy bar adamdar jaýapqa tartylady. Bul iste eshqandaı qıyndyq joq. Tek kútińiz», - dedi mınıstr.
Sondaı-aq, ol kináli qyzmetkerlerge qarsy «qyzmetinen bosatýǵa deıin» jaza qoldaný týraly týraly buıryq daıyndaýdy tapsyrdy.
«Pavlodar, baılanysta barsyzdar ma? Departament basshysy eńbek demalysynan qashan shyǵady? Oǵan duǵaı sálem aıtyńyzdar. Osy oqıǵa boıynsha arnaıy tekserý jiberemin. Qyzmetten bosatýǵa deıin jaza qoldaný týraly buıryq daıyndańyzdar. Eki adam qaza taýyp, eki adamdy kúıik shalǵan. Oǵan eshkim kináli bolmaǵany ma? Jalpy Pavlodar boıynsha jumystaryńyzǵa rıza emespin. Shaǵymdanýshylar kóp keledi. Eshqandaı reaktsııa joq. Zańsyzdyq jaılap alǵan ol jaqty. Barlyq faktiler boıynsha tekserý jiberemin», - dedi mınıstr.
Eske salsaq, búgin QR Іshki ister mınıstri Erlan Turǵymbaev Nur Otan partııasynda azamattardy jeke máseleleri boıynsha qabyldady.
