Pavlodardan Kemerovoǵa avtobýs qatynaıtyn boldy
PAVLODAR. QazAqparat - Pavlodar men Kemerovo arasyndaǵy avtobýs qatynasynyń naýryz-sáýir aılaryndaǵy kestesi jarııalandy, dep habarlaıdy QazAqparat tilshisi.
Jańa avtobýs qatynasynyń jolǵa qoıylǵany týraly alǵash «Kýzbasspassajıravtotrans» kásipornyna silteme jasaı otyryp Qazaqstannyń Reseıdegi elshiligi málimdegen.
Elshiliktiń aqparatyna súıensek, naýryzda 4 reıs, sáýir aıynda taǵy bes reıs júrýi tıis.
«Kemerovo avtovokzalynan reıster 12:05-te, al Qazaqstannan 14:30-da jolǵa shyǵady. Eresekter úshin bılettiń baǵasy 2260 rýbl, balalardyń bıleti 1130 rýbl etip belgilendi. Jolǵa ketetin ýaqyt - 15 saǵat. Buryn Pavlodarǵa avtobýs tek Novosibirden ǵana júretin», - delingen habarlamada.
Avtory: Anton Gagarın
