Pavlodardaǵy jol apaty: Jaıaý júrginshige kirpish qorshaý qulady

PAVLODAR. QazAqparat – Pavlodarda jol apatynan eki kóliktiń jolaýshysy men ótip bara jatqan adam zardap shekti, dep habarlaıdy QazAqparat tilshisi.

Qalada eki jeńil kólik soqtyǵysyp, bireýi jer úıdiń qorshaýyn buzyp ótken.

«Saǵat 08:40-ta Pavlodar qalasynda «VAZ-2110» markaly avtokóliktiń 21 jastaǵy júrgizýshisi Gorkıı kóshesiniń boıynda kele jatyp, Abaı-Gorkıı kósheleriniń qıylysynda «Jol ber» degen jol belgisiniń talaptaryn oryndamastan, «Honda» kóligimen soqtyǵysqan. Soqqydan «VAZ» jeke úıdiń qorshaýyna soǵylyp, ol ótip bara jatqan jolaýshyǵa qulaǵan», - dedi Pavlodar oblysy Polıtsııa departamentinen.

Quqyq qorǵaý organdarynyń málimetinshe, jol-kólik oqıǵasynan ótip bara jatqan adam jaraqat alyp, aýrýhanaǵa jetkizilgen. «Honda» avtokóliginiń eki jolaýshysy, atap aıtqanda, júrgizýshiniń áıeli men qyzy medıtsınalyq kómekke júgindi.

«VAZ-2110» avtokóligi aıyp turaǵyna ornalastyryldy. Tekserý júrgizilip, saraptama taǵaıyndaldy», - dep atap ótti vedomstvodan.