Pavlodardaǵy jol apaty: 3 oqýshy aýrýhanada jatyr
PAVLODAR. QazAqparat – Pavlodarda órt sóndirý kóligi men mektep avtobýsy soqtyǵysqan jol apatyna bilim basqarmasy túsinik berdi, dep habarlaıdy QazAqparat tilshisi.
«Kýágerlerdiń aıtýynsha, avtobýs júrgizýshisi jol erejesin buzbaı, baǵdarshamnyń jasyl túsinde qozǵalǵan. Órt sóndirý mashınasy arnaıy dybystyq sıgnalyn qospastan baǵdarshamnyń qyzyl túsine ótken», - dep málimdedi Pavlodar oblystyq bilim basqarmasynan.
Bilim basqarmasynyń málimetinshe, apat bolǵan kezde avtobýsta 15 oqýshy: №2 mekteptiń 10 oqýshysy, №43 mekteptiń 5 oqýshysy bolǵan. 8 oqýshy oblystyq balalar aýrýhanasyna medıtsınalyq tekserý úshin jetkizilgen.
«Avtobýsta otyrǵan balalarǵa medıtsınalyq kómek kórsetilip jatyr. Olardyń densaýlyǵyna esh qaýip tónip turǵan joq. 3 bala aýrýhanǵa jatqyzyldy, qalǵany úılerinde», - dedi basqarmadan.
Eske salaıyq, búgin saǵat 14:15-te Elgın men Şedrın kósheleriniń qıylysynda «KamAZ» markaly órt sóndirý kóligi «PAZ-32053-70» mektep avtobýsymen soqtyǵysqan. Avtobýs turaqta turǵan «Volkswagen» jeńil avtokóligine soǵylǵan. Keıinirek TJD Elgın kóshesi boıymen kele jatqan avtotsısternanyń kók nemese qyzyl tústi jarqyldaýyq maıagyn jáne arnaıy dybys sıgnalyn iske qosqanyn atap ótti. Órt sóndirý kóligi baǵdarshamnyń qyzyl túsi janǵanda júrip kele jatqan. Şedrın kóshesindegi PAZ avtobýsy oǵan jol bermesten qozǵalysyn jalǵastyryp, órt sóndirý kóligin soqqan.
