Pavlodardaǵy túlekter keshine Qaırat Nurtas pen Álisher Kárimov kelýi múmkin
ASTANA. QazAqparat - Pavlodarda dástúrli mektep bitirýshilerdiń «Jas tolqyn-2017» keshine estrada juldyzdary Qaırat Nurtas pen Álisher Kárimov kelýi múmkin, dep habarlaıdy pavlodarnews.kz .
Oblystyq bilim berý basqarmasy usynǵan aqparatqa súıensek, bıyl óńirde 3738 túlek mektep bitiredi. Onyń ishinde jalpy orta bilim týraly erekshe úlgidegi attestat jáne «Altyn belgi» tósbelgisiniń úmitkerleri - 146. Pavlodar qalasynyń jalpy bilim beretin jáne mamandandyrylǵan mektepterdiń 1481 túlegi úshin «Jas tolqyn-2017» saltanatty keshi 2017 jylǵy 10 maýsym saǵat 21.00-den 24.00-ge deıin ortalyq stadıonda ótedi. Baǵdarlamaǵa sáıkes jastarǵa jalpy orta bilim týraly erekshe úlgidegi attestat jáne «Altyn belgi» tósbelgisi saltanatty túrde tabystalyp, oblys ákiminiń atynan baǵaly syılyqtar (noýtbýkter) syıǵa tartylady. Sondaı-aq, otandyq estradanyń ataqty ártisteri óner kórsetip, ot shashý bolady.
«Biz jyldaǵydaı túlekter arasynda saýalnama jasadyq. Pavlodarlyqtardyń basym bóligi Qaırat pen Álisherdi kórgileri keledi. Degenmen olardyń kelýi, kelmeýi belgisiz, naqty sheshim 8-maýsym kúni shyǵarylady», - dedi oblystyq mádenıet, muraǵattar jáne qujattama basqarmasynda.
