Pavlodardaǵy tarıhı-ólketaný murajaıy qundy jádigerlermen tolyqty
ASTANA. QazAqparat - Pavlodardaǵy Grıgorıı Potanın atyndaǵy tarıhı-ólketaný mýzeıi qundy jádigerlermen tolyqty. Mundaǵy qyzmetkerlerdiń dástúrli ekspedıtsııasy bıyl Ertis, Qachıyr, Jelezın aýdandarymen qatar Reseıdiń Omby oblysyna da bardy, dep jazady Habar 24.
Bul aımaqtarda qazaqtar kóp shoǵyrlanǵan. Munda kóne turmystyq zattar men zergerlik áshekeı buıymdar tabylǵan. Olardyń ishinde eń qundysy - 20-ǵasyrdyń basynda ómir súrgen qazaq bıine tıesili, kúmispen kómkerilgen kise belbeý. Ony osy ýaqytqa deıin saqtap kelgen ombylyqtar arnaıy tabystapty. Qazir oblystyq tarıhı ólketaný mýzeıinde 70 myńnan astam eksponat bar. Ekspedıtsııa «Rýhanı jańǵyrý» baǵdarlamasy aıasynda júzege asqandyqtan zertteý jumystary áli de jalǵasady.
«Sonyń jaqsy nátıjesi kóptegen eksponat kelip, bizdiń murajaıdyń qoryn tolyqtyrdy. Bunyń ishinde en qundy eksponat bul kise belbeý, ol teriden jasalǵan. Kúmispen áshekeılengen. Endi murajaıdyń 40 paıyz qory osy ekspedıtsııanyń nátıjesinde jınalǵan eksponattar dep aıtýǵa bolady», - deıdi G.Potanın atyndaǵy oblystyq tarıhı-ólketaný mýzeıiniń dırektory Gúlnár Nurahmetova.
